ولسمشر غني د کابینې په ناسته کې پر خپل وخت د ټاکنو په ترسره کولو ټینګار کړی دی.
ولسمشر اشرف غني د چهار شنبې په ورځ د کابینې په ناسته کې ویلي، ټاکنې حتمي، ضروري او د حکومت ملي وجیبه ده.
بلخوا بیا په کابل کې د امریکا سفارت د ټاکنو له پروسې سره د ۲۹ میلیونه ډالرو د مرستې اعلان وکړ، چې عملیاتي برخه کې به مصرف شي.
د ملي امنیت شورا سلاکار حمدالله محب په کابل کې د چک جمهوریت له سفیر پیټرس ټېفنېک سره په کتنه کې بیا ویلي، له ټولو ستونزو سره سره، چې سولې ته د رسېدو په لاره کې شته، حکومت ژمن دی، چې په دې اړه جدي کار وکړي.
محب ویلي، دوحه کې د افغانانو ترمنځ وروستۍ ناستې یو لړ ښه پیغامونه درلودل چې پر بنسټ یې کېدلای شي د سولې لپاره د تفاهماتو پروسه پیل شي.
هغه ټینګار کړی، چې د سولې بهیر باید محتاط، دقیق او حساب شوی وي، چې پایله یې افغان ولس ته د ثبات او ښه ژوند راتګ وي.
په ورته وخت کې د چک سفیر ویلي، هیواد یې سولې ته د رسېدو په اړه د افغانانو ملاتړ کوي او دغه راز به د افغان امنیتي او دفاعي ځواکونو د ملاتړ او روزنې برخه کې خپلو مرستو ته دوام ورکړي.
