ولسمشر اشرف غني ویلي، د ټاکنو پروسې بریالیتوب د حکومت لومړیتوب دی.
ولسمشر محمد اشرف غني وایي، هیڅ ملکي او نظامي شخص په ټاکنو کې د مداخلي حق نه لري او د تثبیت په صورت کې به قانوني چلند ورسره وشي.
ولسمشر غني د غزني د ټاکنو په اړه ویلي، د یاد ولایت د ټاکنو په اړه خبرې دوام لري او د غزني خلک به له خپل قانوني حق څخه محروم نه شي.
دغه راز ولسمشر ملکي مسؤولینو ته ویلي، د قوتونو ځای پرځای کول د قول اردوګانو، پولیسو او ملي امنیت صلاحیت دی او ملکي برخې دې په کې مداخله نه کوي.
اشرف غني له دولتي مسؤولینو غوښتي چې د طالبانو د هغو خطرونو او توطئو په تشخیص کې دې دقت وکړي چې غواړي ټاکنې خپل هدف وګرځوي او د ټاکنېزو کمپاینونو او د نوماندانو د مثبتو سیالیو لپاره دې ټول امکانات او امن فضا برابره کړي.
