ولسمشر غني نن سهار د کومانډو ځانګړو عملياتو قول اردو ته ورغی او هلته یې د هغوی د غوښتنو او وړانديزونو د اورېدو ترڅنګ، دوی ته یې د لوی اختر مبارکي وويله.
په یاده قول اردو کې ولسمشر غني د خپلو خبرو پرمهال د ځانګړو قطعاتو ته ډاډ ورکړ چې هر ډول ملاتړ به ورته چمتو کوي او هم به یې اړتياوې پوره کوي.
ارګ د ولسمشر له قوله ویلی: «زموږ د ارادې منشأ د افغانستان، ازادۍ، برابري او د تېرو شلو کلونو لاسته راوړنو ساتنه ده، خو د دښمن نيت تور دی او تاسو ورته ثابته کړې چې خپل هغه ارمان به ګور ته يوسي.»
ولسمشر محمد اشرف غني دغه راز وویل چې طالبان له القاعده، جيش محمد او لشکر طيبه سره ژورې اړيکې لري او غواړي افغانستان د «تروريستانو» په پټنځي بدل کړي، خو د افغانستان دولت او ملت ورته دغه اجازه نه ورکوي.
ولسمشر د خپلو خبرو په پای کې وويل: «موږ د عادلانه او پایداره سولې اراده لرو، خو دښمن دې پوه شي چې هېڅکله نه تسلیمېږو. تاسو دا وړتيا لرئ چې نړۍ او هر قوت ته خپل ظرفيت ثابت کړئ.»
خو طالبانو بیا د ولسمشر غني دغو څرګندونو ته په غبرګون کې څه نه دي ویلي.
