د حج فریضې اداءکولو لپاره دې د ملا امامانو او خطیبانو سهم مشخص او زیات شي.
ولسمشر محمد اشرف غني وایي، له دې وروسته دې په ټولو ولایتونو کې د علماو شورا ریسان په ولایتي ادارې ناستو کې ګډون کوي.
ولسمشر د ولایتونو د حج او اوقافو ریاستونو ته لارښوونه وکړه چې د جوماتونو ملا امامانو ته د کمپیوټر زده کړو زمینه برابره کړي.
ولمسشر محمد اشرف غني چې په ارګ کې یې میلاد النبي غونډه کې خبرې کولې وویل، محمد ص دښمنې قبیلې سره متحدې او دوستې کړې او اوس په اسلام کې تور، سپين، خان او غریب له یو ډول حقوقو برخمن دي.
اشرف غني وایي، له دې وروسته به د حج مراسمو کې د حاجیانو لارښود د جوماتونو ملا امامان وي.
ولسمشر غني وایي، که څه هم په خپل وخت کې د اسلام ستر پیغمبر کله کله اړ کیده جګړه وکړي، خو بیا یې هم جګړه موخه نه وه او د دښمني اوږدول یې نه ښوول.
هغه وایي، راتلونکو نسلونو ته باید داسې زمینه برابره کړي چې جګړه او نفرت په کې نه وي او د پرمختګ لپاره به هڅې ګړندۍ کړي او راتلونکی نسل باید له جګړې خوندي وي.
د غني په خبره اوس هم د پرمختګ لپاره خنډونه شته، خو باید په اسلامي ارشاداتو یې له منځه یوسو.
د اسلام ستر پیغمبر حضرت محمد مصطفی ص به د سرسخترین دښمنانو مقابل کې هم بښنه کوله او غوره اخلاق یې درلودل.
ټولو ته یې اسانه او ارامه فضا رامنځته کړې وه او د سولې او اخوت پیغام یې راوړی و.
