ولسمشرۍ ماڼۍ وايي، ولسمشر محمد اشرف غني د چینایي پانګوالو ګروپ سره چې له ډبرو سکرو د برېښنا انرژۍ د تولید برخه کې پانګونې ته لېواله دي، لېدنه کړې ده.
د ولسمشرۍ ماڼۍ له لوري په خپره شوې خبرپاڼه کې ویل شوي، یاد ګروپ غواړي په افغانستان کې د ۴۰۰ میلیونو ډالرو په پانګونه د ډبرو له سکرو په ګټنې ۳۰۰ مېګا واټه برېښنا تولید کړي.
خبرپاڼه کې وړاندې راغلي،ولسمشر غني د برېښنا شرکت ته امر کړی،چې له یاد ګروپ سره د پانګونې د فرصت برابرولو په اړه لازمې ارزونې وکړي.
افغانستان پر کور دننه د برېښنا د تولید په برخه کې لویه ستونزه لري، خو د خپلو برېښنايي ستونزو د حل لپاره له ایران، ازبکستان، تاجکستان او ترکمنستان برېښنا واردوي،چې د وارداتي برېښنا کلنۍ بیه هم له ۲۸۰ تر ۲۲۰ میلیون ډالرو ته رسېږي.
