ولسمشر غني وایي، په تېره یوه اونۍ کې له زرو زیاتو طالبان وژل شوي چې مسؤلیت یې د طالبانو د سیاسي ډلې پر غاړه دی.
طالبانو بیا د ولسمشر غني دغه ادعا رد کړې او دا یې یو خیال بللی دی.
محمد اشرف غني وایي، جمهوریت د هېچاه میراث نه دی او نه یې هم څوګ انحصار کولی شي.
له دې سره قطر کې د طالبانو د سیاسي دفتر مخکیني مشر شېر محمد عباس ستانکزي د روسیې له ار ټي خبري شبکې سره په مرکه کې بیا ویلي، اوس هم طالبان له امریکا سره د سولې خبرو ته لېواله دي، خو که امریکا جنګ غواړي، نو طالبان سل کاله نور هم جګړه کولی شي.
د دغه پلاوي یو غړي عباس ستانکزي ویلي، امریکایان پخپله اعتراف کوي چې په تېرو اونیو کې یې ګڼ شمېر طالبان وژلي، خو بل لور ته د یوه امریکایي عسکر د وژل کېدو په پلمه د سولې خبرې دروي.
ستانکزي ویلي، که امریکایان ګڼ شمېر طالبان وژلی شي، نو طالبان هم بیا حق لري چې له دوی نه یو دوه کسان ووژني.
ویل کېږي، د طالبانو له سیاسي دفتره یو درې کسیز پلاوی روسیې ته تللی چې له روسي چارواکو سره د افغان سولې خبرو په اړه بحث وکړي.
د راپورونو له مخې، دغه درې کسیز پلاوي تیره ورځ د روسیې له ولسمشر ولادیمیرپوتین او د افغانستان لپاره د روسيې د ځانګړي استازي ضمیر کابلوف سره کتلي دي.
له دې سره له الجزیرې ټلوېزیون سره په مرکه کې د طالبانو د سیاسي دفتر ویاند سهیل شاهین ویلي، د امریکا ولسمشر د داسې یوې موضوع پر سر د سولې خبرې ځنډولې چې په نهه پړاوه مذاکراتو کې پرې هیڅ توافق نه و شوی.
سهیل شاهین ویلي، که متحده ایالات یو ځل بیا د سولې میز ته راوګرځي، نو دوی چمتو دي چې ټول هغه موارد چې پرې توافق شوی عملي کړي.
شاهین ویلي، طالبان چمتو دي چې له تړون وروسته د دوی د ځواکونو د وتلو لپاره خوندي لاره ورکړي او برید پرې ونه کړي.
هغه ویلي، له امریکا سره د سولې هوکړې له لاسلیک وروسته چمتو دي چې له افغان لوري سره مخامخ خبرې پیل او د اوربند ترڅنګ په ټولو هغو مواردو بحث وکړي چې په افغانانو پورې اړه لري.
