د امریکا لخوا بغداد کې د ایران د القدس ځواک مشر قاسم سیلماني وژنې ته په غبرګون کې ارګ ویلي، د افغانستان خاوره به د هېڅ ګاونډي هېواد پر ضد نه کارېږي.
ارګ له ایران او امریکا غوښتي چې خپلمنځي اختلافونه دې د خبرو له لارې حل کړي.
د ارګ په اعلامیه کې ویل شوي چې، افغانستان له ایران سره دیني، دودیزې او تاریخي اړیکې لري او له امریکا سره هم ستراتیژیک تړون لري.
افغان حکومت وروسته له هغې دا غبرګون ښوولی چې امریکا د ایران د القدس ځواک مشر قاسم سلیماني په بغداد کې په یوه هوایي برید کې وواژه.
د امریکا ولسمشر ډونلډ ټرمپ ویلي، سلیماني د میلیونونو کسانو د وژنې مسول و او باید کلونه پخوا وژل شوی وای.
خو ایران د امریکا دا کړنه یو ترهګر عمل بللی او ګواښ یې کړی چې غچ به یې اخلي.
د امریکا بهرنیو چارو وزارت ویلي، د ایران رژیم په ټوله سیمه کې د بې ثباتۍ لامل دی او امریکا به د خپلو وګړو او خپلو خلکو د ساتنې لپاره هر ګام پورته کړي.
د امریکا دې برید چې د ایران د القدس ځواک مشر قاسم سیلماني یې وواژه، په سیمه ییزه او نړیواله کچه هم پراخ غبرګونه را پارولي دي.
د روسیې ولسمشر ولادمیر پوتین دا برید غندلی او خبرداری یې ورکړی چې دې سره به سیمه نوره هم بې ثباته شي.
برتانیې او یو شمېر نورو هېوادونو بیا پر ایران او امریکا غږ کړی چې له زغمه دې کار واخلي.
چین له ټولو خواوو په ځانګړې توګه له امریکا غوښتي چې له زغمه کار واخلي.
افغانستان کې پخواني ولسمشر حامد کرزي او اجرائیه رئیس عبدالله عبدالله هم د قاسم سلیماني وژنه غندلې ده.
بل لور ته د عراق سیاسي او مذهبي مشرانو د قاسم سلیماني وژنه غندلې او هغه یې پر عراق تېری بللی دی.
د عراق لومړی وزیر عادل المهدي ویلي، دا برید کولی شي په سیمه او تر هغې ها خوا جګړه ونښلوي.
