د افغانستان د ټاکنو کميسيون وايي د داېیو په ۳۷۳۶ مرکزونو کې د لومړنیو شمېرو له مخې نژدې ۲.۲ ميليونو کسانو په رایه اچوونه کې ګډون کړی دی.
د ټاکنو کمېسیون ویلي، د پاتې مرکزونو د شمېرو په ور زیاتولو به د رايو ورکوونکو ټولیز شمېر وروسته معلوم شي.
د ټاکنو کمېسیون وايي، دغه مالومات تخمیني دي چې د ټلیفون او راپورونو په اساس له محلونو، مرکزونو او ولایتي ریاستونو څخه تر لاسه شوي دي.
د ټاکنو بهیر شنبه سهار ۷ بجې پيل شو او هر مرکز ته په لسګونو کسان په کتارونو کې ولاړ دي او د رای ورکولو لپاره راغلي دي.
ولسمشر غني او اجرایه رییس عبدالله عبدلله هم په کابل کې رایه وکاروله او له روان بهیر یې رضایت وښود.
د ملي امنیت شورا سلاکار ډاکټر حمد الله محب په ولسمشریزو ټاکنو کې له رای ورکولو وروسته وویل، افغانانو هغه کسان وغندل چې ټاکنې یې نه غوښتې.
محب په خلکو غږ وکړ چې د خپل حق د ساتنې لپاره په ټاکنو کې ګډون وکړي.
د رای ورکوونکې پرمهال یو لړ تخنیکي ستونزې بیا هم تکرار شوې، خود ټاکنو کمسیون وايي، هغه کسان چې نومونه یې نوملړ کې نه وي رایه کارولی شي.
د افغانستان د ټاکنو کمېسیون کمیشنر مولانا عبدالله وویل، د هغو کسانو نومونه چې د رایه ورکوونکو په فهرست کې وي خو د بایومټریک په دستګاه کې ثبت شوي نه وي په هماغه محل کې خپله رایه کارولی شي.
د ټاکنو خپلواک کمېسیون وايي، د څلور زره نهه سوه دوه څلویښت مرکزونو ډاډ ورکړل شوی و چې له دې شمیرې په څلور زره درې سوه اته دیرش مرکزونو کې ستونزه نه وه.
د ټاکنو خپلواک کمېسیون د مالوماتو له مخې په څلور سوه اتلس مرکزونو کې امنیتي او تخنیکي ستونزې وې.
دغه څلور سوه اتلس مرکزونه په بدخشان، کندز او بغلان ولایتونو کې دي چې د ټاکنو کمېسیون د چارواکو په وینا ور سره تماس نه دی نیول شوی.
د مالومات له مخې د ټاکنو لپاره نهه میلیونه کسانو نوم لیکنه کړې، چې ښايي درې میلیونه یې له رای ورکولو بې برخي شي.
کمیسیون وايي، د ښځينه رای ورکوونکو د عکس اخیستو پریکړه یې د ټاکنو د شفافیت لپاره کړې، خو دغه پریکړه له نیوکو سره مل ده چې په ټاکنو کې به د ښځو ګډون کم کړي.
د کابل سربیره په ولایتونو کې هم خلک ډلې ډلې د رای محلونو ته ور روان دي او د خپلې خوښې نوماند ته رایه ورکوي.
وسله والو طالبانو ټاکنې ننګولي خو تر اوسه داسې کومه پیښه نه ده شوې، چې د رای ورکوونکو مخه دې ونیول شي.
