د ټاکنو خپلواک کمېسیون مشره حوا علم نورستانۍ وایي، نن شنبه د ولسمشریزو ټاکنو لپاره د رایې ورکوونکو ملاتړې نوملیکنه پیلېږې چې د سرطان تر اتمې به د شلو ورځو لپاره دوام وکړي.
د ټاکنو د کمېسون په خبره، ملاتړې نوملیکنه د هغو کسانو لپاره ده چې تازه افغانستان ته ستانه شوي وي، د ټاکنو په ورځ اتلس کاله عمر ولري، تېرو رایه ور کوونکو کې یې نوم نه وي، له یوې حوزې بلې ته کوچېدلي وي یا هم د قانون له مخې له مدني حقونو بې برخې شوي نه وي.
حوا علم نورستانۍ وویل، هغو کسانو چې خپلې تذکرې سټېکر کړي دي کولای شي د نوم لیکنې مرکزونو ته لار شي او په دې پروسه کې ګدون وکړي.
نوموړې زیاته کړه چې په غزني کې هغه تذکرې د اعتبار وړ نه دي چې پارلماني ټاکنو کې سټېګر شوې وې او باید له سره تذکرې یې سټېکر شي.
نورستانۍ وویل، د نوم لیکنې شمېر ته په کتو به د رایې ورقې ترتیب شي.
ټاکل شوې د افغانستان ولسمشریزې ټاکنې به له پروګرام سره سم د روان کال تلې یا میزان میاشتې پر شپږمه نېټه کېږي.
د افغانستان ټاکنو خپلواک کمېسیون مسوولین وايي، د دوی د اټکل له مخې د افغانستان راتلونکو ولسمشریزو ټاکنو لومړنی لګښت به ۱۹۲ میلیونو ډالرو ته ورسېږي.
