Skip to content
افغان ولسمشر محمد اشرف غني د یکشبنې ورځ د « زمري پر ۱۰ مه» د کابینې په لومړنۍ برښنايي ناسته کې د وینا پر مهال وویل، طالبان د سولې لپاره هېڅ اراده نه لري، تمرکز یې پرجګړی دی او ظلمونه یې لا ډېر کړي دي.
ولسمشر غني وايي، طالبانو هېڅ مثبت بدلون نه دی کړی او دا ډله یوازې په نیول شویو سیمو کې وېجاړۍ کوي.
ولسمشر محمد اشرف غني :« طالبانو واقعا د تېرو ۲۴ کالونو پرتله بدلون کړی دی. بدلون یې په څه کې دی؟ کرکجن شوي،لا ډېر ظالمان شوي او نامسلمان شوي دي.هو! بدلون یې کړی دی،خو مثبت بدلون نه.»
ولسمشر غني وايي،د طالبانو له خوا نیول شویو سیمو کې وېجاړي رامنځته شوي او ټینګار یې وکړ،چې دا ډله نه غواړي افغانستان کې سوله ټینګه شي.
هغه زیاته کړه،چې طالبانو په ښوونځیو کې له وطن سره د مینې مضمون لرې کړی او د افغانستان تاریخ او جغرافیې لرې کېدو هوډ هم لري.
ولسمشر محمد اشرف غني:« طالبان لومړني کارونه،چې په ولسوالیو کې کوي، څه دي؟ له هېواد سره د مینې برخه له کتابونو وباسي. له یاده مو ونه ووځي، د تاریخ او جغرافیې لرې کېدو هوډ هم لري.»
په ورته وخت کې غني له ټولو وزارتونو په جدي توګه غوښتنه وکړه،چې خپل ځان دې له برښنايي سیستم سره برابر او د مامورینو معاشونه دې پر وخت ورکړي.
په وزارتونو کې برښنايي سیستم نوښت دی او چارواکي تمه لري،چې له دې سره به د خلکو ستونزې راکمې، فساد مخنیوی او د خلکو لپاره به آسانتیاوې رامنځته شي.
