د اطلاعاتو او فرهنګ وزارت سرپرست محمد قاسم وفايي زاده د یوه خبري کنفرانس پر مهال اندېښنه وښودله، چې وسله والو طالبانو ترخپل حاکمیت لاندې سیمو کې د لرغونې اثارو قاچاق ته زمینه برابره کړې او د ساتنې مخنیوی یې کوي.
وفايي زاده وايي:« موږ ان له آی خانم څخه مالومات ترلاسه کړي، وروسته له هغې چې دغه ساحې د وسله والو طالبانو تر ولکې لاندې راغلې، نامسوولو وسلوالو کسانو او ان مافیایي کړیو په غیر قانونه توګه کیدنه پیل کړې او قاچاق هم کېږي.»
کلتور وزارت زیاتوي، چې د جګړو له شدت سره طالبانو په کندهار، تخار، بلخ، هرات، غزني او ځینو نورو ولایتونو کې د لرغونو اثارو د رغولو مخنیوی هم کړی دی.
سرپرست وزیر د یادو ولایتونو پر اوسېدونکو غږ وکړ،چې د اثارو ساتنه وکړي او پر وسله والو طالبانو یې غږ دا و، چې قاچاقبرو ته دې د قاچاق زمینه نه برابروي.
وفايي زاده زیاته کړه:« لرغونې ساحې چې نږدې سل ساحې په افغانستان کې تثبیت شوي او نن موږ ۱۹۹۶ تارېخي آبدې لرو. له دغو ملي او فرهنګي ابدو ساتنه زموږ ټولو افغانانو ملي وجیبه ده او له وسله والو مخالفینو هم غواړم،چې تاریخي ابدو ته زیان ونه رسوي.»
د وسله والو ډلو سربېره پر زورواکانو او خپلسرو وړو ډلو هم نیوکې دي،چې ځینو سیمو کې ګران بیه ډبرې او کانونه کیندي او ګاونډیو هېوادونو ته یې قاچاق کوي.
