د هرات په کرنیزو سیمو کې چې هر کال د وچکالۍ له ګواښ سره مخ وې، سږ کال د بارانونو زیاتوالي د کروندګرو لپاره د نوو هیلو زېري راوړي.
فرید احمد یو له هغه کروندګرو دی چې د طبیعت له دې بدلون څخه خوښ او راتلونکي فصل ته هیلهمن دی.
نوموړي سږ کال پر خپلې دوه نیم جریبه ځمکې غنم کرلي او وايي، د تېرو کلونو په پرتله چې د اوبو کمښت یې کرنیزې چارې له ستونزو سره مخ کړې وې، سږ کال پر وخت او کافي ورښتونو د غنمو وده ښه کړې او د حاصلاتو د زیاتوالي تمه یې ډېره کړې ده.
کروندګر فرید احمد وايي: « ډېر باران د کښتونو د ودې سبب کېږي او بیا ښه حاصلات ورکوي. که خدای کول، سږ کال به ښه پرېمان حاصلات ولرو او ژوند به مو ورسره ښه شي.»
په هرات کې ډېری کروندګر د باراني اوبو پر بنسټ کرنه کوي او د اوبو هر ډول بدلون د دوی پر ژوند مستقیم اغېز لري.
سږ کال د بارانونو دوام نه یوازې د غنمو بلکې د نورو فصلونو لپاره هم ګټور تمام شوی، خو د کیمیاوي سرې د بیو لوړوالی بیا هم د کروندګرو لپاره یوه ستونزه پاتې ده.
کروندګر ټینګار کوي چې دوی اوس هم اصلاح شويو تخمونو، کیمیاوي سرې او د کرنیزو حاصلاتو ساتلو لپاره سړو خونو ته اړتیا لري.
د امېد په نوم یو کروندګر وايي: « یوه بوجۍ سپینه سره ۲۵۰۰ او یوه بوجۍ توره سره ۷۰۰۰ افغانۍ ده. نه یوازې زه بلکې د دې خاورې هر بزګر له چارواکو غوښتنه کوي چې سړې خونې جوړې کړي. تېر کال زموږ د پیازو محصولات ټول ضایع شوې، حتا توربانجان مې په بوټو کې پرېښودل، ځکه چې بازار یې نه درلود.»
کروندګر ګل احمد وایي: « له حکومت غوښتنه کوو چې سړې خونې جوړې کړي، ترڅو موږ خپل محصولات په کې وساتو او په ارزانه بیه یې ونه پلورو.»
په ورته مهال، د هرات کرنې، اوبولګولو او مالدارۍ ریاست مسوولین وایي، له تېر ژمي راهیسې هرات ښار کې ۱۶۵ میلي متره او ولسوالیو کې تر ۲۷۵ میلي متر ورښت چې له دې سره به د کرنیزو حاصلاتو کچه هم لوړه شي.
د هرات کرنې، اوبولګولو او مالدارۍ ریاست د کرنیزو چارو آمر بشیر احمد احمدي وايي: « تاسو ته معلومه ده چې د للمي غنمو کښت په بارانونو پورې اړه لري. که باران ونه شي موږ للمي نه شو کرلی. سږ کال د کرنې وزارت له خوا په ډېر ښه وخت کې یو شمېر بزګرانو ته د للمي او اوبیزو غنمو تخمونه ووېشل شول او د هغوی له خوا وکرل شول. همدارنګه سږ کال ښه ورښتونه هم وشول او زه باور لرم چې ښه حاصلات به ولرو.»
د مسوولینو د معلوماتو له مخې، سږ کال هرات کې ۱۸۰ تر ۲۰۰ زره هکټاره ځمکو باندې غنم او څه باندې ۲۲۰ زره هکټاره ځمکو هم نورې غلې دانې او حبوبات کرل شوي دي.
