د پېښو پر وړاندې مبارزې لپاره د چمتووالي ملي ادارې خبر ورکړی چې په هېواد کې د وروستیو ورښتونو او سېلابونو راوتو له امله ۲۸ تنه هېوادوال شهیدان او ۴۹ نور ټپیان شوي دي.
د دې ادارې وياند وايي، له تېرې پنجشنبې راهیسې په ۲۴ ولایتونو کې تر اوسه د بارانونو، سېلابونو، غر ښوېیدنو او تندر لوېدنو له امله ګڼ شمېر کورنیو ته مالي او ځاني زیانونه اوښتي دي.
محمد یوسف حماد زیاتوي: « د وري میاشتې له شپږمې نېټې تر اوسه په کابل، کاپیسا، پروان، پنجشیر، بامیان، دایکنډي، پکتیا، پکتیکا، لوګر، زابل، کندهار، هلمند، هرات، غور، بلخ، بادغیس، سمنګان، سرپل، بغلان، تخار، جوزجان، فاریاب، بدخشان، ننګرهار او لغمان ولایتونو کې د بارانونو، سېلابونو، غر ښوېیدنې او تندر غورځېدو له امله ۲۸ تنه شهیدان او ۴۹ تنه ژوبل شوي دي.»
د نوموړي په خبره، د وروستيو سېلابونو او ورښتونو له امله ۵۶۸ کورونه، ۹۳ کیلومتره سړک، ۲۹۰۰ جرېبه کرنیزه ځمکه، ۱۰ هټۍ، ۵۲ د اوبو څاګانې تخريب او يو شمېر څاروي هم تلف شوي دي.
حماد زياتوي، د پېښو پر وړاندې مبارزې لپاره د چمتووالي ملي ادارې په لارښوونه به زيانمنو شویو هېوادوالو ته بېړنۍ مرستې ورسېږي.
محمد یوسف حماد په دې اړه وايي: « همدارنګه ۱۳۰ استوګنیز کورونه په بشپړ ډول، ۴۳۸ په نیمه ډول او ۱۰ بابه دوکانونه هم څه ناڅه ویجاړ شوي دي. د دې ترڅنګ، ۲۴ د اوبو څاه ګانې، ۹۳ کیلومټره سړکونه، ۳۰ د اوبو شبکې، ۲ زره ۹۰۱ جریبه کرنیزه ځمکه، ۱ زر ۹۳۸ ونې چپه او ۲۴۴ څاروي تلف شوي دي. په ټولیز ډول ۱ زر ۱۳۰ کورنۍ د دغو پېښو له امله زیانمنې شوې دي.»
د اوبو او انرژۍ وزارت بیا وایي، د وروستیو ورښتونو له امله د هېواد په بېلابېلو سیمو کې یو شمېر بندونه له اوبو ډک شوي دي.
د دې وزارت په خبره، په هرات کې د پاشدان بند، غزني کې د سلطان بند او کابل کې د شاه او عروس او قرغې بندونه له اوبو ډک شوي دي.
وزارت زیاتوي، د بندونو د اوبو کچې لوړېدل له یوې خوا د هېواد د اوبو د مدیریت وضعیت ښهوالي ښکارندویي کوي او له بلې خوا د کرنې سکټور د پیاوړتیا لامل ګرځي.
د اوبو او چاپیریالي چارو کارپوه نجیبالله سدید وايي: « د اوبو د مدیریت په اړه باید ډېر کارونه وشي. باید بندونه، چک ډیمونه او کانالونه جوړ شي او له سېلابونو څخه د خلکو او استوګنیزو سیمو د ساتنې لپاره تاسیسات جوړ شي. دا ډول کولی شي د ورښتونو پر وړاندې د ټولنو زیانمتوب کچه راټیټه کړي. زه فکر کوم د کليو په کچه د اوبو مدیریت هم کولی شي خلک د سېلابونو له زیانونو خوندي کړي. که اوبه سمې مدیریت شي، له یوې خوا به د اوبه خور لپاره اوبه ولرو او له بلې خوا به ترځمکې لاندې اوبو زېرمې هم ډکې شي.»
د ملګرو ملتونو د خوړو او کرنې سازمان هم ویلي چې په افغانستان کې د څلورمې پرلهپسې اوونۍ لپاره د ورښتونو وړاندوېینه شوې.
یاد سازمان زياته کړې، وروستیو بارانونو په ډېرو سیمو کې د خاورې رطوبت زیات کړی او دا د للمي کښت لپاره ګټور بلل کېږي؛ ځکه چې د کرنیزو حاصلاتو پر ودې او زیاتوالي مثبت اغېز لري.
له دې ټولو سره، د ټرانسپورټ او هوایي چلند وزارت د هواپېژندنې ادارې دوشنبه او سېشنبه هم په ډېرو ولایتونو کې د ورښت او سېلابونو راتلو اټکل کړی.
همدارنګه، د هوا پېژندنې نړیوالو ادارو اټکل هم څرګندوي چې روانه اوونۍ او راتلوونکې اوونۍ به د هېواد په ډېرو برخو کې ورښتونه ادامه ولري.
