له افغان ملي شخصیتونو سره د تماس کمېسیون په ټولو هغو پخوانیو دولتي چارواکو او سیاسیونو چې د اسلامي امارت په راتګ سره یې هېواد پرېښی او بهر وتلي غږ وکړ، چې بېرته خپل هېواد ته راوګرځي.
د دغه کمېسیون وياند احمد الله وثیق وايي، اوس امنیت تامین او په هېواد کې د پانګونې لپاره تر بل هر وخت ښه زمینه برابره ده او هغه کسان چې اوس بهر کې دي کولی شي چې خپل هېواد ته راستانه شي او په ډاډمنه فضا کې د افغانستان په پرمختګ او بیا رغونه کې ونډه واخلي.
وثیق زیاتوي، هغه څېرې چې له بهره منفي تبلیغات کوي خپلې شخصي ګټې په خطر کې ویني او په خبره یې ټول هغه افغانان چې د سوی تفاهم او یا هم تبلغاتو له امله بهر ته تللي او هلته پاتې دي ډاډه دې اوسي چې افغانستان د ټولو افغانانو ګډ کور دی او دوی کولی شي چې خپل هېواد ته راشي او د تبلغاتو تر اغېز لاندې دې نه ځي.
هغه وايي: « هر هغه افغان چې د منفي تبلغاتو له امله له هېواده وتلی، هغوی ته بلنه ورکوو چې د امیرالمومنین حفظهالله د عفوې له عمومي فرمان او دې نېک فرصته ګټه واخلي او خپل هېواد ته دې راشي او په خپل وطن کې له دوستانو او خپلوانو سره یو ځای ژوند وکړي. الحمدالله افغانستان امن دی او ټول هغه کسان چې په تېره اداره کې یې دندې ترسره کړي او هغه چې دنده یې نه ده ترسره کړې خو له هېواده تللي را دې شي او په خپل وطن کې دې واوسېږي.»
له افغان شخصیتونو سره د تماس کمېسیون له رامنځته کېدو تردې مهاله له ۸۰۰ زیات هغه افغان چارواکي او سیاسیون چې د جمهوریت له سقوط سره سم، له هېواده وتلي وو له دغه کمېسیون سره د اړیکو له لارې بېرته هېواد ته راستانه شوي دي.
د یاد کمېسیون د ویاند په خبره، په بېرته راغلو کسانو کې د تېر حکومت وزیران، د پوځ جنرالان، امنیه قوماندانان، د ملي شورا او ولایتي شوراګانو غړي، د وزارتونو معینان او ولسوالان شامل دي.
وثیق وايي: « له کومې ورځې چې له افغان شخصیتونو سره د تماس کمېسیون ایجاد شوی، تر دې مهاله له۸۵۰ زیات کسان له دې لارې هېواد ته راستانه شوي دي. د وزیرانو په کچه کسان راغلي دي، د وزارتونو د معینانو په کچه راغلي، والیان، ولسوالان، امنیه قوماندانان، د پارلمان او شوراګانو غړي دا ټول راغلي او ترڅنګ یې ډېر شمېر هغه کسان چې مسلکي او وړ کسان وو او پخوا ورته دلته د راتګ زمینه برابره نه وه، هغه هم خپل هېواد راستانه شوي او په کارونو بوخت دي.»
له هغې وروسته چې جمهوریت نسکور شو او اسلامي امارت واک ته ورسېد، د اسلامي امارت زعیم ملا هبة الله اخندزاده د عمومي عفوې اعلان وکړ چې اوس د اسلامي امارت چارواکي په وار وار د تېر نظام له سیاسیونو او چارواکو غواړي چې د عفوې له دغه فرمان ګټه واخلي او د بیا ځلي لپاره دې د نورو په خبرو نه تېروځي.
