وانګ يي ويلي، دوه طرفه پوځي اقدام کولای شي د ستونزې حل پر ځای د کابل او اسلام اباد ترمنځ کړکیچ نور هم زیات کړي.
وانګ یي زیاته کړې:« پوځي اقدامات د ستونزو د حل لاره نه ده او له دې سره د کړکېچ سطحه نوره هم لوړېږي. چین د تفاهم او باور د رامنځتهکېدو لپاره د رغنده رول لوبولو ته چمتوو دی.»
په دغه ټېلېفوني مکالمه کې د بهرنیو چارو وزیر مولوي امیرخان متقي پر افغانستان د پاکستان وروستیو تیریو په غبرګون کې ويلي، افغانان له خپل ولس او حریم د دفاع مشروع حق لري، خو په عین وخت کې د ستونزې زیاتوالي د مخنیوي لپاره پر سیاسي حل باور لري او ملاتړ یې کوي.
متقي زیاته کړې، افغانستان له خپلو ټولو ګاونډیو او سیمې هېوادونو سره د باور، متقابل درناوي او اقتصادي همکاریو د پراختیا غوښتونکی دی او اسلامي امارت د هر ډول کړکیچ د حل لپاره ډېپلوماسي او خبرې د حل ښه لار بولي.
د بهرنیو چارو وزارت مرستیال ویاند ضیا احمد تکل وايي:« د هېواد بهرنیو چارو وزیر د پاکستان له لوري د افغانستان پر ملي حاکمیت د وروستیو تیریو په اړه د اسلامي امارت موقیف هم شریک کړ او څرګنده یې کړه چې افغانستان د خپل ولس او ځمکنۍ بشپړتیا د دفاع مشروع حق بولي. خو په ورته وخت کې د کړکېچ پراخېدو پر ځای له سیاسي حل ملاتړ کوي. مقتي زیاته کړه چې د پاکستان په بمباریو او توغندیزونو بریدونو کې زیاتره ولسي وګړي ښځې او ماشومان په نښه کېږي او ملکي تاسیسات تخریبوي چې ښه بېلګه یې د تېرې شپې د کابل او کندهار بریدونه دي.»
په ورته مهال د افغانستان سولې لپاره د امریکا پخواني ځانګړي استازي زلمي خلیل زاد پر افغانستان د پاکستان پوځي رژیم وروستيو بریدونو ته په غبرګون کې ویلي، پاکستان باید ژر تر ژره روان تاوتریخوالی ودروي او د خبرو له لارې ستونزه حل کړي.
هغه څرګنده کړې:« اسلاماباد باید هر څه ژر تاوتریخوالی راکم کړي، د خبرو مېز ته کېني، که نه د افغانانو له سخت غبرګون سره به مخ شي. زه د پاکستان په بریدونه کې د ملکي افغانانو په نښه کېدل غندم او یا د پاکستان حاکم بنسټونه د دې وړتیا لري چې پاکستان په مسوولانه توګه رهبري کړي که نه؟»
د سیاسي چارو شنونکي بیا وايي، چین له دواړو هېوادونو سره ښې او نږدې اړیکې لري او په سیمه کې اغیزمن هېواد دی کولای شي چې د افغانستان او پاکستان ترمنځ د ستونزې په حل کې مثبت رول ولوبوي.
د سیاسي چارو شنونکی شهزاده مسعود وايي:« چین په سیمه کې یو ستر هېواد دی او له پاکستان سره هم ښې ستراتیژیکې اړیکې لري، له افغانستان سره یې هم اړیکې نږدې دي. ما پخوا هم ویلي و، بیا هم وایم چې په سیمه کې چین، روسیه او ورسره نور ګاونډي هېوادونه دوی ټول کولای شي چې د پاکستان او افغانستان د شخړې په حل کې یو مثبت رول ولوبوي. زما په اند باندې پاکستان باید په لومړۍ مرحله کې د افغانستان له خلکو بښنه وغواړي ځکه چې د افغانستان پر حریم یې تجاوز کړی دی او بیا یې چې کومه خساره رسولې په ځاني او مالي لحاظ باندې د دې جبران هم باید وکړي.»
له امیرخان متقي سره په ټېلېفوني خبرو کې د چین بهرنیو چارو وزیر وانګ يي ټينګار کړی چې هېواد یې د سیمې ثبات او امنیت لپاره سیاسي تفاهم او د ستونزو د حل میکانیزمونه مهم بولي او په دغه برخه کې د افغانستان له ډیالوګ محوره دریځ هرکلی کوي، خو دعامو خلکو او ملکي تاسیساتو په نښه کول ورته د منلو وړ نه دي .
د پاکستان پوځي رژيم پنجشنبه د شپې په هوايي بریدونو کې یو ځل بیا عام افغانان او ملکي تاسیسات په نښه کړل چې ښځو او ماشومانو ته په کې مرګ ژوبله واوښته.
