واشنګټن پوسټ د خپلو امریکایي سرچینو په حواله ویلي، د ولسمشر جو بایډن اداره دا مهال له اسلامي امارت سره د یوه داسې میکانیزم جوړولو په خبرو بوخته ده،چې پر بنسټ به یې د افغانستان مرکزي بانک کنګل شوې شتمني ټوله یا هم یوه برخه آزادیږي.
د یاد امریکایي نشريې په راپور کې ویل شوي، دا پیسې افغانستان کې د بشري ناورین سره د مبارزې په موخه آزادیږي او اجازه به ورنه کړل شي،ترڅو طالبان ترې ناسمه استفاده وکړي.
د راپور یوه برخه:« د بایډن ادارې له طالب چارواکو سره پر داسې یو میکانیزم کار کوي،چې پر بنسټ به یې طالبان وکولای شي،چې ټولو کنګل شویو پیسو یا د دغو پیسو یوې برخې ته لاسرسی ولري،تر څو له روان انساني ناورین سره مرسته وکړای شي. امریکا په ورته مهال کې هڅه کوي، ترڅو ډاډه شي،چې دا پیسې په ناسم ډول نه کارول کیږي.»
له دې سره همهاله د افغانستان اسلامي امارت بهرنیو چارو سرپرست وزیر مولوي امیر خان متقي پر مشرۍ د افغانستان بانک او مالیې وزارت چارواکو یو پلاوی د قطر پلازمینې دوحې ته روان شوی او ټاکل شوې ده،چې هلته د امریکا متحده ایالتو له ځانګړي استازي توماس ویسټ او د دغه هېواد د خزانې وزارت له چارواکو سره وګوري.
بهرنیو چارو وزارت ویلي، په دغه لیدنه کې به د سیاسي او ګڼو نورو موضوعاتو په ګډون پر بانکي نظام هم خبرې وشي.
اخوا اقتصاد پوهان په دې باور دي،که اسلامي امارت د امریکا متحده ایالتو شرایط ومني او ژمنې ورسره وکړي،نو دا سفر به له لاسته راوړنو ډک وي او د افغانستان کنګل شوې پیسې به راخلاصې شي.
د اقتصادي چارو کارپوه لعل ځاځی وايي:« که چیرته طالبان ژمنه وکړي،چې دغه پیسې به له پولي سیاست سره په مطابقت کې لګوي او په نورو برخو کې به یې نه لګوي. نو زه هېله من یم،چې دا سفر به له لاسته راوړنو ډک وي او افغانستان به دا پیسې ترلاسه کړي.»
