د امريکا دفاع وزیر مارک ایسپر وايي، واشنګټن افغانستان کې د ځواکونو د دوامداره ساتلو په لټه کې دی
نوموړي دا خبره په بروکسل کې د ناټو د دفاع وزیرانو د غونډې په دويمه ورځ وکړه او ټينګار يې وکړ چې ناټو په افغانستان کې د غوڅ ملاتړ ماموریت ته ژمنه ده.
ایسپر زیاته کړه، چې د ناټو متحدانو په ناسته کې د افغان ځواکونو جوړښت د اصلاح کولو په مسلو خبرې شوې دي.
هغه زیاته کړه د تاوتریخوالي کموول د سولې د پروسې د بیا پیل لپاره اړین دی.
مارک ایسپر همداراز وويل، طالبان بايد پوه شي چې دوی د جګړې له لارې نه شي بريالي کېدای.
د ناټو سرمنشي ینس سټولټنبرګ بیا وایي، د ناټو مرستې به افغان ځواکونه پیاوړي کړي، چې د نړیوالې ترهګرۍ سره به د مبارزې سربېره سولې ته شرایط برابر کړي.
سټولټنبرګ چې رسنیو سره یې خبرې کولې وویل، طالبان د جنګ له لارې موخې ته نشي رسېدای او باید د سولې مېز ته کېني.
د ناټو سرمنشي وایي، د ناټو غړي هېوادونه به له افغانستانه د وتلو پرېکړه په مناسب وخت کې وکړي او په وینا یې که وخت مناسب نه وي او دوی د وتلو پرېکړه وکړي بدې پایلې به ولري.
