د هېواد په اوو ولايتونو کې د سېلابونو تازه څپې خلکو ته ځاني او مالي زيانونه اړولي دي.
دغه سېلابونه جمعه د شپې پرمهال د کابل، پنجشېر، لوګر، لغمان، خوست، ننګرهار، میدان وردګو او بغلان ولایتونو په ځينو برخو کې راوتلي دي.
د لوګر په دشت بهاري، راهې خوشي، الوخېلو، کمال خېل، تنګي واغجان سيمو کې سېلابونو کرنيزې ځمکې ویجاړې کړې او ترڅنګ یې د ځايي اوسېدونکو کورونه هم سطحي ويجاړ کړي دي.
د لوګر اوسېدونکی محمد شاکر وايي: « موږ دلته د کوچنیانو مکتب سره پراته یو. شاوخوا ۱۱ بجې تېز باران او وروسته سېلاب راغی. ما یوازې خپل ماشومان وایستل، کور او د کور سامان مې سېلاب یوړل.»
د مېدان وردګو سیمه ییز چارواکي هم په دې ولایت کې د درنو ورښتونو خبر ورکوي او زياتوي چې د سلابونو راوتلو له امله په نرخ، چک، سیداباد او دایمیردادو ولسوالیو کې خلکو ته مالي زیانونه اوښتي.
همدارنګه د ننګرهار د لعلپورې ولسوالۍ اوسېدونکي وایي، دې ولسوالۍ کې شدید بارانونه ورېدلي چې په پايله کې يې د راوتلو سېلابونو له امله ځمکې او فصلونه زیانمن شوي دي.
د دوی په خبره، د یادو بارانونو او سېلابونو له امله د ننګرهار ډېرو سیمو کې شاوخوا ۵۰۰ جرېبه کرنيزه ځمکه زیانمنه شوې ده.
د ننګرهار اوسېدونکی نوید مایار وايي: « دلته په ځينو ساحو کې شاوخوا ۵۰۰ جریبه ځمکه تخریب شوې. له حکومت غوښتنه کوو چې له زیانمنو سره مرسته وکړي.»
افغانستان یو کرنیز هېواد دی، خو د معیاري کرنیز سیسټم نه لرل د دې لامل شوي چې کروندګر د طبیعي پېښو له امله زیانمن شي.
ځينې زیانمن شوي کسان له سرپرست حکومت او مرستندویانو د مرستې غوښته کوي.
سېلاب ځپلی عرفات وايي: « دا کور چې تاسو ګورئ، دا تېره شپه سېلاب ویجاړ کړی. د دې ترڅنګ نور کورونه او یو محراب جومات هم ویجاړ شوي. له حکومت غوښتنه کوو چې د ویجاړو شویو کورونو په جوړولو کې همکاري وکړي.»
له طبيعي پېښو سره د مبارزې چمتووالي ملي ادارې مسوولین وایي، په څو ولایتونو کې د ورښتونو او سېلابونو راوتلو له امله ۲ تنو ژوند بايللی او ۵ تنه نور ټپيان شوي دي.
دوی زیاتوي، څه باندې ۱۰۰کورونه او ۶زره ۲۰۰ جرېبه کرنیزه ځمکه هم د دغو ورښتونو او سېلابونو له امله ویجاړه شوي دي.
له پېښو سره د مبارزې چمتووالي ملي ادارې د اطلاعاتو او نشراتو رییس محمد یوسف حماد وايي: « له پېښو سره د مبارزې ریاستونو د لومړنیو معلوماتو له مخې، په تېرو ۴۸ ساعتونو کې د بارانونو او ورښتونو له امله دوه کسان شهیدان شوي، دوه کسان ټپیان شوي، له ۱۰۰ زیات کورونه په بشپړه یا جزئي بڼه ویجاړ شوي او شاوخوا ۶ زره ۲۰۰ جریبه زراعتي ځمکې او حاصلات له منځه تللي. په کابل، پنجشېر، خوست لوګر، میدان وردګو او لغمان ولایتونو کې د وروستیو سېلابونو له امله زیانمنو شویو کسانو ته د سروې او همهاله د غبرګون پروسه پيل شوې ده.»
د حماد په خبره، د طبیعي پېښو د مخنیوي لپاره په ټولو ولایتونو کې پوره چمتووالی نیول شوی او د يادې ادارې مرستندویه ټیمونه هڅه کوي چې د احتمالي پېښو پرمهال خلکو ته پر وخت رسېدنه وکړي.
محمد یوسف حماد په دې اړه وايي: « د یادونې وړ ده چې د حمل میاشتې له پیل د جوزا تر پایه پورې، له بده مرغه د طبیعي او غیر طبیعي پېښو له امله نږدې ۷۶۵ کورونه په بشپړه توګه ویجاړ شوي، ۱ زر ۹۵۸ کورونه په جزئي ډول ویجاړ شوي، شاخوا ۳۴ زره ۴۸۷ جریبه ځمکې او حاصلات له منځه تللي او ۶۶۲ لمریزې تختې ویجاړې شوې دي.»
دا په داسې حال کې ده چې په وروستیو کالونو کې خلک د اقلیمي بدلون له امله له ورته طبيعي پېښو او له وچکالۍ سره مخ دي.
