د هېواد په ډېری ولايتونو کې له څو ورځو راهيسې په دوامداره توګه د سختو ورښتونو او په لړ کې يې د سېلابونو راوتلو له امله خلک په پراخه کچه زيانمن شوي.
پېښو ته د رسېدو په چارو کې د دولت وزارت ویاند عارف جانان سایق وايي، د يادو سېلابونو له امله ۷۰ کسان مړه او د ۵۶ نورو له ژوبل کېدو سربېره د درېيو جوماتونو او ۴ ښوونځيو په شمول ۲۶۲۷ بابه کورونه هم په نیمه او بشپړ ډول تخریب شوي دي.
د سایق په خبره، د لسګونو کسانو له مړینې سربېره شاوخوا ۲۰۱۷ څاروي تلف او ۹۵۸۶۱ جریبه کرنيزه ځمکه هم تخريب شوې.
هغه وايي: « په افغانستان کې له اختره را وروسته د ورښتونو او سېلابونو لړۍ روانه ده. په ټول افغانستان کې نږدې ۷۰ کسانو هېوادوالو خپل ژوند له لاسه ورکړی او ۵۶ نور ژوبل شوې دي، همداراز ۲۶۲۷ کورنه په نیمه او بشپړ ډول تخریب شوې دي، درې جوماتونه شهیدان او څلور ښوونځي تخریب شوې، ۲۰۱۷ څاروي تلف شوې او په ټول افغانستان کې نږدې ۹۵۸۶۱ جریبه کرنیزه ځمکه تخریب شوې ده.»
د سرپرست حکومت چارواکو د ملګرو ملتونو له اړونده ادارو او نورو همکارو موسسو سره سېلاب ځپلو ته د مرستو رسولو په موخه بېړنۍ مرسته هم کړې او پر هغو لارو چارو يې خبرې کړې، چې په لړ کې يې زيانمنو شویو ته د مرستو رسېدل ممکن کېدای شي.
سایق زیاتوي: « پرون هم موږ له موسساتو سره جلسه درلوده او په هغې کې مو داسې پلان ونیو چې ټول هغه هېوادوال چې زیانمن شوي او د هغوی چې ژوند یې ژغورل شوی، ستونزې به یې له موسساتو سره په ګډه حل کوو، ټولې اړتیاوې به یې په پام کې نیسو، ان شاءالله لومړی به د دوی سروی کېږي له سروی وروسته به د دوی د خوراک او پوشاک ټولې اړتیاوې پوره شي، که کرنیزې ځمکې یې تخریب شوې وي په دې برخه کې به هم ورسره مرسته وشي او پوره پوره همکاري به ورسره کوو.»
د مالوماتو له مخې، د وروستیو ورښتونو او سېلابونو له امله په لوېدیځ او په ځانګړې توګه هرات کې خلکو ته زيات زيان اوښتی.
ځايي مسوولین وايي، د ورښتونو او سېلابونو له امله په هرات کې ۲تنه مړه شوي او په اوبې، ادرسکن، چشت شریف او انجیل ولسوالۍ کې د کرنيزو ځمکې له تخریبېدو سربېره شاوخوا ۸۰ کورونه هم ویجاړ شوي او ۲سوه څاروي تلف شوي دي.
د هرات د والي ویاند نثار احمد الیاس وايي: « له بده مرغه هرات کې د وروستیو سېلابونو له امله زموږ هېوادوالو ته مالي او ځاني زیانونه اوښتي، په یو شمېر ولسوالیو کې په لوړه کچه ځمکې تخریب شوې دي.»
له حکومتي ادارو سربېره د ملګرو ملتونو د بشري مرستوهمغږي کوونکې ادارې (اوچا) هم په ولايتونو کې خلکو ته اوښتی مالي او ځاني زيان تائيد کړي.
دې ادارې ډاډ ورکړی، چې زيانمنو شویو کورنيو ته به له اړتيا سره سمې پر وخت مرستې ورسوي.
