له څو ورځو راهيسې د پلازمېنې کابل په ګډون ډېری ولایتونو کې د باران اورېدو په پایله کې د سېلابونو را وتلو له امله، خلکو ته مالي او ځاني زيانونه اوښتي.
پېښو ته د رسېدو په چارو کې د دولت وزارت ویاند ملا جانان سایق وايي، د يادو سېلابونو له امله په ۲۴ ولايتونو کې شاوخوا ۷۰۶ کورونه، ۷زره جرېبه کرنيزه ځمکه او ۱۷۷ کيلومتره لويې لارې او فرعي سړکونه وېجاړ شوي دي.
د جانان په خبره، د کورونو د وېجاړېدو له امله شاوخوا ۵۰ تنه مړه او ۳۶ تنه نور ټپیان شوي دي.
بادغیس، ارزګان، تخار، زابل، پروان، ننګرهار، هلمند، کابل، خوست، دایکندي، کونړ، کاپیسا، پنجشېر، پکتیکا، لوګر، لغمان او هرات هغه ولايتونو دي، چې د نورو پرتله په کې سيلابونو خلکو ته زيات ځاني او مالي زيانونه اړولي دي.
سایق وايي:« په هېواد کې د بارانونو او سېلابونو څپه راغلې، کم هېوادوال یې زیانمن کړي، د هغوی له ډلې شااوخوا ۵۰ هېوادوالو خپل ژوند له لاسه ورکړی دی او ورسره په څنګ کې ۳۶ هېوادوال ژوبل شوي، شااوخوا ۷۰۶ کورونه په کلي او جزي توګه په ټول هېواد کې تخرب شوي دي. دغه راز ۷ زره جریبه زراعتي ځمکې هم تخریب شوي دي.»
سایق وايي، د سېلاونو له امله په ټول هېواد کې له ۲۰۰ زیات څاروي هم تلف شوي او له ۱۰۰۰ زیاتې کورنۍ هم زیانمنې شوي دي.
هغه زیاتوي:« هلته کوم هېوادوال چې په سېلابونو کې بند پاتې ول، له ملي دفاع وزارت سره په همغږۍ موږ ورته رسېدنه کړې، د طیارو په وسیله مو هغه هېوادوال خپلو خوندي ځایونو ته لېږدولي دي، ورسره په څنګ کې چې د کومو خلکو کورونه تخریب شوي ول، هغه مو خوندي یعني د دوی خپلوانو کورونو ته ولېږدول. کومو چې هلته ځایونه نه لرل، هغه مو ښوونځيو او نورو خوندي ځایونو ته ولېږدول.»
که څه هم په ډېری ولايتونو کې د بارانونو له امله خلک زيانمن شوي او د دوام په اړه يې اندېښنه لري، خو پېښو ته د رسېدو په چارو کې د دولت وزارت ویاند وايي، په لرې پرتو سيمو کې بزګران د تازه بارانونو له امله د خپلو حاصلاتو زياتوالي ته خوشبين دي.
دا په داسې حال کې ده، چې د وري میاشتې له پیل تر اوسه د سېلابونو له امله ۲۲ زرو زیاتو زیانمنو کورنیو ته د ملي او نړيوالو موسسو په همکارۍ بېړنۍ مرستې وېشل شوي او د مرستو لړۍ لاهم دوام لري.
