هندي امنیتي سرچینې وايي،په کنفرانس کې به د سیمې پر کچه د بېلابېلو استخباراتي او څیړنو سازمانونو مشران ګډون وکړي.
هندي امنیتي سرچینې وايي:«په دې کنفرانس کې به ګڼ امنیتي سیمنارونه جوړ شي او د سترو څېړنیزو او استخباراتي سازمانونو مشران به په کې ګډون وکړي او پر سترو ننګونو او ګواښونو به په کې خبرې اترې وشي.»
هند کې امنیتي سرچینې وايي، د دغې کنفرانس مهمه اجنډا به د چین او افغانستان له لوري هند ته د پیښو ګواښونو په اړه وي.
په دغه کنفرانس کې به د نړیوال راډیکالیزم یا افراطیت او د ترهګرۍ د نوي پړاو په اړه هم یو شمیر څیړنیز او تحلیلي سیمنارونه جوړ شي.
د هند امنیتي سرچینې وايي:« په دې کې به یوه هېواد ته د پیښو ګواښونو په اړه خبرې ونه شي،بلکې د بېلابېلو هېوادونو له لوري د بېلابېلو ګواښونو په اړه به په کې بحثونه وشي. په دې امنیتي کنفرانس کې به د نړیوال افراطیت، د ترهګرۍ نوي دور او ګڼو نورو امنیتي مسایلو په اړه څېړنیز سیمینارونه جوړ شي.»
په پام کې ده،چې په دغه هر اړخیز امنیتي کنفرانس کې د هند لومړی وزیر نریندرا مودي هم ګډون وکړي.
