د هند په پلازمېنه نوي ډیلي کې د هند په ګډون د مرکزي اسیا پنځه هېوادونه تاجکستان، ترکمنستان،قزاقستان،قرغزستان او ازبکستان د بهرنیو چارو وزیران سره راټول شوي او د افغانستان په اړه یې خپلې اندیښنې سره شریکې کړې.
په ناسته کې په دې هم ټینګار شوی دی،چې د افغانستان ځمکنۍ بشپړتیا ته درناوی لري،خو نور هېوادونه دې هم د افغانستان په چارو کې لاس وهنه نه کوي.
دغو هیوادونو غوښتنه کړې ده،چې په اوسنیو شرایطو کې باید له افغان ولس سره بشري مرستې وشي.
د دوي اندیښنه دا وه،چې دافغانستان له خاورې ورته ګواښونه پېښېدونکي دي،خو اسلامي امارت بیا وار دمخه ټولې سیمې او نړۍ ته ډاډ ورکړی دی، چې د افغانستان له خاروې به چاته هېڅ ډول ګواښ پیښ نه شي.
په دغه ناسته کې د هند د بهرنیو چارو وزیر جی شنکر وویل،هېواد یې له افغانستان سره اوږدې او ژورې اړیکې لري او اندېښنې او موخې یې یو ډول دي.
شنکر وايي،په افغانستان کې د ټول شموله حکومت د جوړېدو غوښتونکی او همدا راز باید د نشه یي توکو د قاچاق مخه ونیول شي او ترهګرۍ سره مبارزه وشي.
شنکر زیاته کړې، چې له افغانانو سره باید بشري مرستې وشي او د ښځو او ماشومانو حقونه هم باید په پام کې ونیول شي.
شنکر زیاتوي:« موږ له افغانستان سره ډېرې ژورې او اوږدمهالې اړیکې لرو. زموږ اندېښنې او موخې په دغه هېواد کې یو ډول دي. ټول ګډونه حکومت، د ترهګرۍ پر وړاندې مبارزه او د نشه یې توکو د قاچاق مخنیوی. موږ د افغان ولس لپاره د بشري مرستو غوښتوونکي یو او د ښځو، ماشومانو او لږکیو د حقونو غوښتنه هم کوو. موږ باید داسې لارې چارې ومومو،چې له افغان ولس سره مرسته وکړي.»
د یادو هېوادونو بهرنیو چارو وزیرانو د ناستې په پای کې ګډه اعلامیه نشر کړه،چې په کې له سوله ییز او باثباته افغانستان ملاتړ شوی او له نورو هېوادونو غوښتل شوي،چې د افغانستان په چارو کې لاس وهنه ونه کړي .
د هند او منځنۍ اسیا هېوادونو د ګډې اعلامیې یوه برخه:« د مرکزي اسیا هېوادونو بهرنیو چارو وزیرانو د سوله ییز، باثباته او خوندي افغانستان ملاتړ وکړ. موږ د هغوی ملي حاکمیت، یو والي او ځمکنۍ بشپړتیا ته درناوی کوو او غواړو،چې نور هېوادونه یې په چارو کې لاسوهنه ونه کړي. بهرنیو چارو وزیرانو له افغانستان سره د بشري مرستو پر دوام هم ټینګار وکړ.»
په هند کې له ناستې سربېره د پاکستان په پلازمېنې اسلام آباد کې هم دافغانستان په اړه د اسلامي هېوادونو د همکارۍ سازمان ناسته جوړه شوې وه.
