Skip to content
د افغانستان په اړه د سیمې د امنیتي غونډې درېیمه ناسته د هند پلازمېنه نوي ډيلي کې ترسره شوه.
د دغې غونډې ګډونوالو د افغانستان د سیاسي او امنیتي وضعیت په اړه خبرې کړي دي.
د هند د بهرنیو چارو وزارت له خوا خپره شوې اعلامیه کې ویل شوي، چې د غونډې ګډونوالو په افغانستان کې د ټولشموله حکومت پر جوړېدو ټینګار کړی دی.
د غونډې ګډونوالو په افغانستان کې د ټولشموله حکومت جوړېدل یوه اړتیا ګڼلې او ویلي یې دي، چې د دغه هېواد د ټولو وګړو غوښتنو ته باید پام وشي.
په اعلامیه کې راغلي، چې په دې ناسته کې د ترهګرۍ، نشه يي توکو قاچاق او له افغانستان سره د بشري مرستو د دوام په اړه خبرې شوي دي.
په دې غونډه کې د ایران، قزاقستان، قرغیزستان، روسیې، تاجیکستان، ترکمنستان او ازبېکستان د ملي امنیت سلاکارانو ګډون کړی و.
د هند د ملي امنیت سلاکار ویلي، په افغانستان کې د ترهګرۍ پر وړاندې د مبارزې په برخه کې ګاونډي هېوادونه باید ګډه کړنلاره رامنځته کړي.
د غونډې ګډونوالو د یوې اعلامیې په خپرولو سره ویلي، چې د افغانستان خاوره باید د ترهګرو د امن پټن ځای په توګه ونه کارول شي.
په دې غونډه کې له افغانستانه کوم استازی نه و غوښتل شوی او همداراز چین او پاکستان هم ونه غوښتل، چې د هند په کوربتوب د سیمې په دې امنیتي غونډه کې ګډون وکړي.
