نن د هند د ممبۍ ښار پر مشهور او ستر هوټل د برید لس کاله پوره شول.
پاکستان باید د حافظ سعید په نیولو کې کوټلي ګامونه پورته کړي.
د هند د ممبي اوسیدونکو پر تاج هوټل د برید یاغونډه و نمانځله او پر پاکستان یې نیوکه وکړه چې د دغه برید عاملینو ته یې تر اوسه سزا نه ده ورکړې.
په ۲۰۰۸ کال کې د ممبۍ په تاج هوټل وسله وال برید وشو چې له امله یې ۱۶۰ تنه و وژل شول.
لس کاله وړاندې پر تاج هوټل برید وشو چې په ترڅ کې یې له ۱۶۰ تنو زیات و وژل شول او لسګونه نور ټپیان شول.
نن د دغه برید قربانیانو ته د لوړپوړو چارواکو په شتون کې د درناوی مراسم ترسره شول.
بل لور ته بیا د ممبي اوسیدونکي چې دغه برید یې اوس هم نه دی هیر کړی وايي پاکستان دې د حافظ سعید په نیولو کې کوټلي ګامونه پورته کړي ځکه ددې برید تر شا د هغه لاس و.
د ممبۍ اوسیدونکي محمد توفیق داسې وویل (( پاکستان باید د حافظ سعید په نیولو کې جدي اقدامات وکړي. هغه ددې ټول برید تر شا لاس درلود. زما وجود سوځي، زما وینه جوش کوي چې داسې مجرمین وینم چې ازاد ګرځي. اجمل قصاب خو یوازې یو مزدور و خو اصلي عاملین ذاکر رحمان او حافظ سعید دي چې باید سزا ورکړل شي.))
د ممبۍ یوې بلې اوسیدونکې داسې ویلي (( نن ددې برید ۱۰ کاله پوره شول خو داسې نه ښکاري چې لس کاله تیر شوي اوسي، زه اوس هم د مرمیو غږونه اورم، داسې ښکاري چې زه نن په مرمۍ لګیدلې یم. دا یادونه اوس هم ماته تازه دي، هغه درد زه اوس هم حس کوم. خو زما درد به هله کرار شي چې د دغه برید اصلي عاملینو ته سزا ورکړل شي.))
دغې برید درې ورځې دوام وکړ چې ټول هوټل پکې د اور لمبو نیولی وو.
نن هم د دغه برید د یادغونډې په خاطر په ممبي ښار کې کلک امنیتي تدابیر نیول شوي و او پولیسو هر ځای د تالاشۍ پوستې جوړې کړې دي.
خبریال : سیال یوسفي
سمونه : جان محمد مومند
