د هلمند پوهنتون د غونډو په تالار کې له نشه یي توکو څخه پاک افغانستان په نوم درې ورځنی ملي کنفرانس جوړ شوی چې د هېواد له ټولو ولایتونو دیني علما، د پوهنتون استادان، متخصیصین او قومي مشران په کې ګډون لري.
د لوړو زده کړو وزیر د کنفرانس ګډونوالو ته خبرو کې وویل چې د نشه یي توکو په مخنیوي کې هڅه وکړي او له خلکو څخه یې په دې اړه د اسلامي امارت د مشرتابه حکم اطاعت کولو غوښتنه وکړه.
د لوړو زده کړو وزیر ندا محمد ندیم زیاته کړې: « دا چې د اسلامي امارت زعیم دېته متوجه دی چې د معتادینو د درملنې لپاره مختلف مراکز جوړ کړي او پر دې مضر بوټي یې د ممنوعیت فیصله کړې، دا په خپله د دې سبب دی چې دا بوټی به نور په افغانستان کې ختمېږي او تر ډېره حده ختم شوی هم دی. دا کنفرانس موخه هم همدا ده چې راشئ د دې عظیم خدمت ښه ملاتړ وشي.»
د دې کنفرانس چمتو کوونکي وایي، کنفرانس ته د هېواد له بېلابېلو ولایتونو څخه ١٤٦ علمي مقالي وړاندې شوې چې ٥٠ به یې په دې کنفرانس کې ګډون کوونکو ته واورول شي.
د هلمند پوهنتون د عامه اړیکو مسوول عبدالباري حنظله وايي: « د دې مقالو له ډلې به ۵۰ مقالې دلته په پوهنتون کې د درېیو ورځو په اوږدو کې وړاندې کېږي. دا مقالې بېلابېل اړخونه لري او د څېړونکو، علماوو، مفکرینو او پوهانو د څېړنو زېږنده دي. په دې مقالو کې د نشه يي توکو کښت له ټولنیز، دیني، روغتیايي او فرهنګي پلوه څېړل شوی او په کې دولت ته د نشه يي توکو د مخنیوي طرحې وړاندې شوې دي.»
دا کنفرانس کې د کوکنارو او نشه یي توکو پر زیانونو، مخنیوي او بدیلو لارو بحثونه وشول.
ګډونوال وایي، له دې مقالو څخه به له نشه یي توکو څخه د مخنيوي د لارو چارو او کروندګرو ته د بدیلو لارو د ښودلو په موخه لازمې طرحې جوړې کړي او د تطبیق لپاره به یې اړونده ادارو ته وسپاري.
د کنفرانس ګډون کوونکی قریب الله صافی وايي: « له نشه يي توکو پاک افغانستان کنفرانس ته له مختلفو ولایتونو څخه څېړنو خپلې مقالې را لېږلې دي چې په یوه په کې زموږ د روانپوهنې له څانګې څخه هم شامله ده. همدارنګه په دې مقالو کې موجوده چارواکو ته وړاندیزونه هم شوي، ترڅو چارواکي یې له مخې داسې طرحه چمتو کړي چې هلمند او ټول افغانستان له نشه يي توکو پاک شي.»
د کنفرانس ګډون کوونکی نصیب احمد حقیار وايي: « موږ کوښښ کو د دې کنفرانس د پایلو په وسیله داسې پالیسي جوړه کړو چې د نشه يي توکو د مخنیوي لپاره کار ترې واخیستل شي.»
هلمند چې وړاندي د کوکنارو د کرکیلې او مخدره توکو د تولید مرکز بلل کېده، د اسلامي امارت له بیا واکمنېدو را ورورسته په کې د کوکنار کښت صفر شوی. د دې بوټي له صفر کېدو سره د هلمند کروندګر د بدیلو کښتونو غوښتنه کوي.
