۲۱۵ میوند قول اردو وايي، تېره شپه افغان دفاعي ځواکونو د هلمند په نادعلي ولسوالۍ کې عملیات کړي، چې په پایله کې یې شاوخوا ۳۰ تنه وسله والو طالبانو ته مرګ ژوبله اوښتې ده.
۲۱۵ قول اردو وایي، د دې عملیاتو په لړ کې د هوایي ځواکونو یوې (ایم ۱۷) چورلکې د تخنیکي ستونزې له امله بېړنۍ ناسته کړې.
د قول اردو په وینا، د چورلکې ټوله حمله خوندي ده او د هوایي ځواک د نورو سرتېرو لخوا د عملیاتو له ساحې اېستل شوي دي.
قول اردو زیاتوي، چې وروسته بیا افغان ځواکونو یاده چورلکه د عملیاتو په سیمه کې ویجاړه کړې او له منځه یې وړې ده.
بلخوا بیا طالب ویاند قاري یوسف احمدي وايي، چې یاده چورلکه د دوی له لوري ویشتل شوې او رانسکوره شوې ده.
