Skip to content
په کابل ولایت کې د هلمند ولایت یو شمېر مدني فعالانو نن دوشنبه د « ۱۴۰۰ کال د زمري پر ۱۸ مه» ناسته کې وویل چې په جګړې کې د ملکي وګړو مرګ ژوبلې سخت اندېښمن کړي دي.
مدني فعالان وايي، هلمند کې شااوخوا درېیو اوونیو جګړو کې د ښځو او ماشومانو په ګډون نږدې ۱۵۰۰ کسانو مرګ ژوبله اوښتې ده.
مدني فعال مسعود چوپان وايي: «له ټولو عامه ځایونو د سنګر په توګه کار اخېستل کېږي،ځکه تېرو شلو ورځو کې شااوخوا ۳۴۲ تنه ملکي کسان وژل شوي او ۶۷۹ ملکي کسان ټپیان شوي دي، چې دریېمه برخه یې ښځي او ماشومان دي.»
هلمندي فعالان وايي، په لښکرګاه ښار کې د جګړې له امله ملکیانو ته د سر زیان سربېره درانه مالي زیانونه اوښتي او دخلکو شتمنۍ په اور سوځېدلې،چې ورسره د خوراکي توکو بیې هم لوړې شوي دي.
دوی له حکومت او طالبانو دواړو غوښتنه وکړه چې د جګړې پرمهال دې د ملکیانو ژوند ته پام وکړي.
مدني فعال شریف علیزی وايي: «زرګونه کورنۍ له خپلو کورونو بې ځایه شوي او کورونه یې ویجاړ شوي دي.»
د هلمند مدني ټولنې مشر وايي: «په دغه جګړه کې په میلیونونو زیان خلکو ته رسېدلی دی. مارکيټونه سوځېدلي، چې د خوراکي او غیر خوراکي توکو او درملو له کمښت سره مخ یو.»
هلمند ولایت کې له تېرو دوو میاشتو راهیسې سختې جګړې روانې دي او ان د لښکرګاه ښار ترمنځ رسېدلې، خو ځايي امنیتي مسوولین وايي، وسله وال یې له ښاره پر شاه تمبولي او د ځمکنیو او هوايي بریدونو پرمهال طالبانو ته د درنو تلفاتو اړولو ادعا کوي.
