د ټرافیک پوليسو عمومي رياست په هېواد کې د هغو موټرو لپاره د نړیوالو نمبر پلېټونو وېش له هرات ولایت څخه پيل کړ چې نورو هېوادونو ته تګ راتګ کوي.
د دوی په خبره، دغه ګام د موټرو د قانوني پېژندنې، د تګ راتګ د اسانولو او په پوله کې د ستونزو کمولو په موخه پورته شوی او ورسره به له ګاونډیو هېوادونو سره د تګ راتګ بهیر اسانه شي.
د ټرافیکو ریاست د تعقیب او پلټنې عمومي مدیر عبدالودود خیرخواه وايي: « د افغانستان د ټرافیکو مرکزي ریاست د هغو لارښوونې له مخې چې د افغانستان اسلامي امارت د ریاست الوزرا مقام له خوا ورته شوې، د افغانستان او ایران ترمنځ د مسافرو او بار لېږدوونکو وسایطو لپاره نړیوال نمبرپلېټ او د ګرځېدلو جواز[جواز سیر] ترتیب او د وېش لړۍ یې پیل کړي.»
بله خوا، موټر چلوونکي هم مني چې په دې سره به یې په ګډو پولو کې د تګ راتک ستونزې هوارې شي، خو غوښتنه کوي چې د نمبر پلېټونو د ویش بهیر دې لا چټک او لګښتونه دې يې راټيټ کړل شي.
د یوه ټرانزیټي شرکت مسوول الیاس حیدري وايي: « دا زموږ د هېواد لپاره یو نوی ویاړ دی او که خدای کول دا به د ټرانزیټ په برخه کې ګڼې اسانتیاوې رامنځته کړي.»
موټر چلوونکی سید عالم صدیقي وايي: « زما ټکسي موټر اوس اطرافي نمبر پلېټ لري، خو ټاکل شوې موږ ته نړیوال پلېټونه راکړل شي. له اسلامي امارت غوښتنه کوو چې د نمبرپلېټونو د وېش لړۍ اسانه، چټکه او ارزانه کړي.»
موټر چلوونکی غلام نبي یوسفي وايي: « د دغو پلېټونو او جواز سیر بیه باید دومره وي چې موټر چلوونکي یې د ورکولو وس ولري.»
د مسوولینو د معلوماتو له مخې، په لومړي ګام کې به په هرات کې ۶۰۰ مسافر لېږدونکو بسونو او ټکسي موټءو او ورپسې ۷ زره بار وړونکو لارۍ موټرو ته چې له ایران سره تګ راتګ لري، دا ډول نمبر پلېټونه ووېشل شي.
