د هرات ولایت ځايې مسولین وايې، له ایرانه تازه راستنېدونکو لپاره د کاري زمینو برابرولو هڅې يې ګړندۍ کړي.
دوی زیاتوي، د هرات صنعتي ښارګوټي کې له ایران د راستنېدونکو افغانانو جذب ظرفیت شته او هڅه کوي چې په لومړي ګام کې هرات کې مېشتېدونکو کورنیو څخه یو یو کس د خصوصي سکتور په مرسته پر کار وګوماري.
د هرات صنعت او سوداګرۍ رییس بشیر محمد سیرت وايي:« موږ چمتو یو چې د خصوصي سکتور په مرسته مسلکي کسان په کارخونو کې په مسلکي برخو کې او کاریګر بیا د ساده کاریګر په توګه تولیدي کارخونو کې په کار وګومارو او د د ې لپاره تصمیم نیول شوی دی.»
د هرات صنایعو او کانونو خونې رییس عبدالناصر امین وايي:« موږ خپلو خلکو سره دا ژمنه کوو هره کورنۍ چې راځي او هرات کې مېشت کیږي. له هرې کورنۍ به یو کس په کار ګږمارو. لومړی هغه کسان چې مسلکي دي ګومارو او بیا غیر مسلکي کسان ګومارو او دا د خلکو او هېواد پر وړاندې د صنعتکارانو یوه دنده ده.»
بلخوا د هرات کار او ټولنیزو چارو ریاست مسوولین هم وایي، له ایرانه راستنېدونکي لوستي او مسلکي کسان به دولتي او خصوصي ادارو ته ورپیژنې او همداراز غیر مسلکي کسانو لپاره به د همکارو موسساتو په همکارۍ د حرفوي زدهکړو زمینه برابره اود کار لپاره به د اړتیا وړ کیټونه ورکړي.
د هرات کار او ټولنیزو چارو ریس میرزا محمد ابو منصور وايي:« هغوی چې راستنیږي موږ کولی شو ورته د حرفوي زدهکړو زمینه برابره کړو او تر شپږو میاشتو وروسته ورته سرتفکت او کیټونه ورکول کیږي چې بیا دوی اضافه سرمایي ته ضرورت ونه لري.»
بل خوا راستنېدونکي افغانان هم ټینګار کوي چې په کور دننه دې ورته د کار زمینه برابره شي چې بیا د بې وزلۍ له امله کډوالۍ ته اړ نه شي.
له ایرانه راستون شوی ناظم وايي:« هیله من یم چې د افغانستان دولت د ځوانانو لپاره بودیجه او کار برابر کړي ترڅو موږ له تنګدستۍ او فقر نجات پیدا کړو.»
له ایرانه یو بل راستون شوی قربان محمد وايي:« زه خیاط یم. له اسلامي امارت هیله من یم که وکولی شي زموږ لپاره کار ګاه جوړه کړي چې په کي ۱۰۰ کسانو ته به د کار زمینه هم برابره کړم او کوټ او شلوار به بهرنیو هېوادونو ته هم صادر کړو، دا زموږ د هېواد هم پر ګټه ده.»
د ایران او اسرايیلو ترمنځ د جګړې زور سره هېواد ته د افغان کډوالو راستنېدو لړۍ چټکه شوې او د مسوولینو مالوماتو له مخې، په ورځني ډول تر ۱۰ زره کسان د اسلام کلا له لارې هېواد ته راستنېږي.
