په هرات ولایت کې د صنعتي ښارګوټي څلورم فاز ته د برېښنا نښلولو چارې پیل شوې.
صنعت کاران دغه چارې د پانګونې زیاتوالي او نورو نویو صنعتي کارخونو فعالیت پیل لپاره غوره اقدام ګڼي خو زیاته وي چې د خپلي پانګونې او صنعتي چارو پراختیا لپاره د ځمکې له کمښت سره مخ دي.
دوی له حکومته غواړي چې د کارخونو فعالیت ودې لپاره ځمکه د صنعتکارانو په واک کې ورکړي.
د هرات صنایع او کانونو خونې مشر حمیدالله خادم وايي:« ډېری پانګه وال د ځمکو د توزیع په تمه دي. ۱۴۲ نمرې ځمکې چې په څلورم فاز کې دي. دا پانګه والو ته بسنه نه کوي. موږ د صنعت او سوداګرۍ له وزارته هېله لرو چې د څلورم فاز د پروژې په لړ کې موږ باید پنځم فاز هم ولرو.»
صنعتکار زلمی سعیدي وايي:« له بده مرغه موږ ځمکه نه لرو. زموږ پانګه وال کرايي ځمکې یا خپلو ماشینونو ته ځمکې نه لري؛ نو له اسلامي امارته مو هېله دا ده چې ژر تر ژره صنعتکارانو ته په مناسبه بیه ځمکې ورکړي.»
بل خوا د صنعت او سوداګرۍ وزارت مسوولین وایې، د بېلابېلو ولایتونو صنعتي ښارګوټو کې یې د سړکونو جوړولو او د برښنا زیاتوالي لپاره یې اړین اقدامات تر سره کړي او په پام کې ده د هرات صنعتي ښارګوټي څلورم فاز برېښنا نښلولو چارې د ۴۴ میلیون افغانیو په لګښت د دغه وزارت پراختیایې بوديجې څخه د پنځه میاشتو په موده کې بشپړې شي.
د صنعت او سوداګرۍ وزارت د صنعتي پارکونو د پراختیا امر علي محمد وايي:« لومړۍ پروژه چې په هرات کې یې پرانېستنه وشوه، د دویمې پروژې پرانېستنه انشاءالله په خوست کې لرو او همدا شان د مزارشریف په حیرتانو کې موږ د پروژو پرانېستنه لرو، داسې نورې پروژې هم پلان کې لرو چې ژر تر ژره نورو پروژو ته هم ادامه ورکړو او په پارکونو کې نورې پروژې فعاله کړو.»
هرات کې سیمه ییز مسوولین هم وایې په پام کې ده د دغه ولایت صنعتي ښارګوټي څلورم فاز کې د زر جریبه ډېری ځمکه باندې ۱۴۲ نوې کارخونې جوړي شي.
د هرات صنعت او سوداګرۍ مشر محمد بشیر سیرت وايي:« صنعت خو الحمدالله پرمخ روان دی، په ځانګړې توګه هرات کې د افغانستان په کچه موږ یو صنعتي ښارګوټی لرو، چې دا څلور فازونه لري، څلورم فاز یې د برېښنا دی د برېښنا پروژې د پرانېستنې لپاره د ۴۴ میلیونه بودیجې اټکل شوی دی.»
دا په داسي حال کې ده چې د هرات صنعتي ښارګوټي کې صنعتکاران ډېری وختونه د برښنا له کمښته شکایت کوي او له مسوولینو د یادې ستونزې حل غوښتنه کوي.
