هرات کې د کرنې نوي فصل پیل کېدو سره، د کروندګرو د ملاتړ او د کرنې برخه کې د اوبو کمښت ستونزې هوارولو په موخه، د سلما بند اوبه خوشي شوې.
چارواکي وايي، د پرله پسې وچکالیو د اغېزو کمولو لپاره یې د شل ورځو لپاره ثانیه کې ۸۰ متر مکعبه اوبه خوشي کړې، تر څو د کرنې فصل له پیل سره د دې ولایت ۸ ولسوالیو چشت شریف، اوبه، پشتون زرغون، ګذره، انجیل، زندجان، غوریان او کهسان لپاره او دغه راز په ۱۲۰ کانالونو کې کروندګر د خپلو کرنیزو ځمکو خړوبولو لپاره ترې ګټه پورته کړي.
د هرات والي ویاند محمد یوسف سعیدي وايي: « دا اوبه د ۲۰ شپو او ورځو لپاره د هرات والي په امر د کرنې او زراعت د خړوبولو لپاره خوشي شوې. د همدې لپاره د هرات ولایت له ټولو کروندګرو غوښتنه کوو چې له دې اوبو څخه د څاڅکي په بڼه په غوره توګه ګټه پورته کړي.»
هرات کې د کرنې لپاره د اوبو کاروونکو ټولنې رییس غلام حبیب هاشمي وايي: « له دې اوبو څخه د ۸ ولسوالیو او ۱۲۱ ویالو کروندګر او بزګران ګټه اخلي. په هره ثانیه کې تقریبا ً ۸۰ مترمکعبه اوبه له سلما بند څخه خوشي کېږي، ترڅو هغه بزګران ترې ګټه پورته کړي چې د مني په فصل کې د کښتونو په کرکیله بوخت دي.»
دا په داسې حال کې ده چې د هرات کروندګر دا مهال تر ډېره د غنمو، باقلیو او اوربشو په کرکیله بوخت دي.
دا چې سږ کال په دې ولایت کې د کرنې نوي فصل له پیل سره سم د سلما بند اوبه خوشي شوې، د فصلونو راتلونکي ته د کروندګرو هیلې تازه شوې دي.
کروندګر وایي، تېرو وچکالیو سخت ځپلي او هیله لري چې اړوند مسوولین د اړتیا په وخت کې بیا هم د سلما بند اوبه ور خوشي کړي.
کروندګر نور الله وايي: « اوبه یې په ډېر ښه وخت کې را خوشي کړې؛ دا د دهقان فصل دی او هر کروندګر په کې نوی کښت کري.»
کروندګر دلبر وايي: « له تېرو څو کالو راهیسې وچکالۍ زموږ خلک ډېر ځپلي، هغوی چې څاه ګان لري وابه هم لري او چې څاه نه لري، اوبه هم نه لري.»
کروندګر عبدالرازق وايي: « همدا د کښت او کرنې وخت دی او د لړم یا عقرب له ۱۵ مې پيل کېږي. دا د اوبه کولو لپاره ښه وخت دی.»
باور دادی چې د هېواد په کچه د اوبو لوی او کوچني زېرمه کوونکو بندونو له جوړېدو او اوبو مدیریت سره به نه یوازي د وچکالیو پر مهال د اوبو کمښت ستونزه هواره شي بلکي تر ځمکې لاندې اوبو زېرمې به هم بېرته راډکې کړي.
