هرات ولایت کې د کرنیزو حاصلاتو او مالدارۍ محصولاتو نهم نندارتون جوړ شو.
مسوولان وایي، یاد نندارتون د کروندګرو او بڼوالانو کرنیزو حاصلاتو او تازه مېوو ته د بازار موندنې په موخه جوړ شوی چې۴۰ غرفو کې یې انګور، انځر، شات او نورې تازه میوې د درېیو ورځو لپاره نندارې ته وړاندې شي.
د هرات کرنې، اوبو لګولو او مالدارۍ ریاست د کرنیزو چارو آمر بشیراحمد احمدي وايي: « سږ کال د کرنیزو او مالدارۍ د محصولاتو نهم نندارتون په هرات ولایت کې جوړ شو. په دې نندارتون کې له ۴۰ ډېرې غرفې اېښودل شوې او د هرات ولایت د کرنې او مالدارۍ محصولات په کې نندارې ته اېښودل شوي.»
په همدې حال کې د هرات سوداګرۍ او پانګونې خونې مسوولین بیا روان کال کې د تېر کال په پرتله بهرنیو هېوادونو ته د تازه مېوو صادراتو له زیاتوالي خبر ورکوي.
د دوی په خبره، روان کال د تازه مېوو صادراتو کچه له ۷۰ ټنو ۵۴۴ ټنو ته لوړه شوې.
د هرات سوداګرۍ او پانګونې خونې اجراییه آمر محمد یوسف امین وايي: « موږ په ۱۴۰۴ کال ۵۴۴ ټنه ۷۲۲ کیلو تازه مېوې چې انګور، مڼې، آلوبالو، ګیلاس او نورې مېوې په کې شاملې دي، د هرات له باغونو ترلاسه کړې او د روسیې، متحده عرب امارتو او سعودي عربستان په ګډون یو شمېر هېوادونو ته صادرې شوې دي.»
که څه هم مسوولان د تازه مېوو د صادراتو زیاتوالي خبره کوي، خو سوداګر او بڼوالان بیا د مېوو صادراتو برخه کې د وېزو ترلاسه کول او په کور دننه یې له ټیټو بیو شکایت کوي.
سوداګر محمد ابراهیم رسولي وايي: « د هېواد شرایطو ته په کتو، فعلا ً د مېوې لپاره د نړۍ پر کچه ارزانترین هېواد افغانستان دی. موږ رقابتي بازارونو ته لاسرسی نه لرو، تاجران مو د وېزې ستونزې لري او بڼوال مو سړې خونې نه لري.»
د هرات اوبې ولسوالۍ بڼوالو د انجمن مسوول جلیل احمد حبیبي وايي: « د بازار نوسانات هر کال د هرات بڼوالو ته زیان رسوي. یو کال د مېوې بیې لوړې دي، خو بل کال بیا خریدار نه لري. قېمتونه د هرې میاشتې په بدلېدو ښکته پورته ځي، موږ ثابتې بیې نه لرو.»
د مسوولینو د مالوماتو له مخې، په پام کې ده سږ کال هرات کې ۱۸۰ زره تر ۲۰۰ زره ټنو انګور، ۱۰ زره ټنه انځر او څه باندي ۱۷۰ ټنه شات ترلاسه شي.
