د ځینو موټرچلوونکو د بې احتیاطۍ له امله هرات کې د یو شمېر کورنیو لپاره اختر په ویر بدل شو.
د دې ولایت حوزوي روغتون مسوولین وایي، د اختر درېیو ورځو کې د ټرافیکي پېښو له امله دغه روغتون ته شاوخوا ۲۰۰ ټپیان وروړل شوي دي.
د هرات حوزوي روغتون سر طبیب فرهاد افضلي وايي: « لکه څرنګه چې تاسو په جریان کې یاست، د روژې په اختر کې مو تقریبا ً له ۲۸۰ تر ۳۰۰ تنو د ټرافيکې پېښو ټپیان لرل، خو په لوی اختر کې د دغو ټپیانو کچه له ۲۰۰ تنو ټیټه ده؛ یانې د اختر په درېیو ورځو کې مو له ۲۰۰ کمې ټرافیکي پېښې لرلې.»
که څه هم د لوی اختر پرمهال هرات کې د ټرافیکي پېښو له امله د ټپیانو شمېر زیات دی، خو د حوزوي روغتون مسوولین وایي، هلته موده وړاندې پر یو ټایر د موټرسایکل ځغلونې له بندیز سره د تېر کوچني اختر پرتله ټرافیکي پېښو کې ۳۰ تر ۳۵ سلنه کموالی راغلی و.
د هرات حوزوي روغتون سر طبیب په دې اړه وايي: « لکه څرنګه مې چې وړاندې وویل، د هغو شمېرو له مخې چې موږ یې سږ کال د اختر په شپو ورځو کې د ټرافیکو پېښو له امله لرو، پېښې کمې شوې دي. د دې لامل ښايي دا وي چې د ښار په داخل کې چټکې او په یوټایر ځغلونې کمې شوې او له همدې امله د تېرو اخترونو په پرتله په دې اختر کې د پېښو او ټپیانو شمېر کم و.»
بله خوا، هرات حوزوي روغتون ته ځینې وروړل شوي ټپیان وایي، د موټرسایکل ځغلوونکو او موټر چلوونکو د بې احتیاطۍ قرباني شوي او غوښتنه کوي چې موټرچلوونکي دې ټرافیکي اصول په پام کې ونیسي.
اختر کې یو تن ټپي شوی وايي: « باید مخنیوی وشي او له هغو کسانو سره قانونی چلن وشي چې په ښار کې تېز موټر یا موټرسایکل چلوي. زما مخکې ته یو بایسکېل چلوونکی را والوت، ما د هغه د ژوبلېدو مخنیوی وکړ، خو خپله ژوبل شوم.»
اختر کې یوبل ټپی شوي وايي: « زما غوښتنه له ټولو دا ده چې خپله نقلیه وسایط آرام وچلوئ، له هېڅ نه رسېدو ناوخت رسېدل ښه دي.»
دا په داسي حال کې ده چې څه موده وړاندې د هرات امنیې قوماندانۍ چارواکو دغه ولایت کې د ټرافیکي پېښو کموالي په موخه پر یو ټایر د موټرسایکل ځغلولو باندې بندیز ولګاوه او د بې احتیاطه موټرسایکل ځغلوونکو سره یې د جدي او قانوني چلن خبرداری ورکړ.
