په هرات ولای کې لیلا یوه له هغو ښځو ده چې شاوخوا ۱۲ کاله وړاندې یې خاوند له لاسه ورکړی دی. هغه وایي، په کور کې د سرپرست نه لرلو له امله اړه ده چې د خپلې ۷ کسیزې کورنۍ مړولو لپاره کار وکړي.
لیلا اوس مهال د ۱۸۰ افغانیو په بدل کې پوره ورځ د پستو مغز پاکوي، خو دغه پيسې يې د اولادونو د نفقې چمتو کولو او د کور کرایې ورکولو لپاره کافي نه دي.
هغه زیاتوي:« دوولس کاله کېږي چې زما د ماشومانو پلار مړ دی؛ اووه تنه کوچني ماشومان را له غاړې دي. تر ټولو مشر زوی مې د اعصابو تکلیف لري او په کور پروت دی او ورپسې دویم زوی مې د مزدورۍ لپاره ایران ته استولی. اوس د کور ټولې ستونزې او لګښتونه ماته راپاتې دي.»
یوازې لیلا نه ده چې له دې ستونزو سره مخ ده بلکې ترڅنګ یې ګڼې نورې هم ښځې هم ورته ستونزې لري.
نسیمه یوه له دغو ښځو ده، وايي، شاوخوا ل۱۰ کاله کېږي چې خاوند یې پر نشه يي توکو روږدی دی او له تېرو ۷ کالو راهیسې یې د مړي او ژوندي پته نه مالومېږي.
نسیمه هم د لیلا په شان د خپلو اولادونو مړولو لپاره د پستو مغز پاکوي او هیله لري چې د نشه يي توکو په بشپړ مخنيوي سره د هغې په شان نورې ښځې هم د خاوندانو د اعتياد له امله له کړاو سره مخ نه شي.
نسیمه په دې اړه وايي: « له اسلامي امارت غوښتنه کوم چې د نشه يي موادو په اړه ډېره هڅه وکړي او تریاک له منځه یې یوسي؛ ترڅو هېڅوک په دغو موادو معتاد نه شي.»
دغو ښځو ته د پستو مغز پروسېس کارخونې کې د یوه سوداګر له خوا د کار زمینه برابره شوې ده.
د پستو د پروسېس دغې کارخونې مسوولین وایي، شاوخوا ۵۰ تنو بې سرپرسته او بېوزله ښځو ته یې د کار کولو زمینه برابره کړې.
د کارخونې مسوول نظرمحمد عطایي وايي: « په دې ښځو کې د ځینو خاوندان ورک دي او د ځینو مړه شوي دي. دوی ته ماشومان ورپاتې دي او داسې څوک نه لري چې د دوی سرپرستي وکړي. دا ښځې د مجبوریت له امله دلته کار ته راځي.»
دا په داسي حال کې ده چې په هېواد کې تېرو جګړو له امله ډېری کورنیو خپل نارینه له لاسه ورکړي او سرپرستي یې د ښځو غاړې ته لوېدلې ده.
که څه هم د اسلامي امارت له خوا څو ځله دغه شان ښځو ته د ستونزو هوارولو ډاډ ورکړل شوی، خو بې سرپرسته ښځې وايي، تر اوسه يې هېڅ لاسنیوی نه دی شوی.
