په هرات ولایت کې یو شمېر د انګورو بڼوال وايي، د تیر کال ژمي سړې هوا او سږنۍ وچکالۍ له امله د انګورو په حاصلاتو کې د پام وړ کموالی راغلی دی.
بصیر احمد د هرات انجیل ولسوالۍ اوسېدونکی دی، دیرش کاله کیږي په بڼوالۍ بوخت دی.
هغه وایي، سږ کال د سړې هوا او وچکالۍ له امله يې حاصلات د تېرو کلونو په څېر نه دي.
د بصير احمد په خبره، د حاصلاتو کموالی د دې لامل شوی دی چې د بڼوالو عايد هم کم شي.
هغه زیاتوي:« دغه بڼ چې تاسې یې وګورئ میراثي بڼ دی. دا ماته له پلاره پاتې دی، له ۳۰ ییا ۳۵ کلونو راهیسې بڼ او بڼوالي زما کار دی؛ خو له دومره مودې را په دېخوا له بده مرغه سږکال تر ټولو سخت کال وه، ځکه چې په ژمي کې د سړې هوا سختې څپې تاقونه خراب کړل، یخ ووهل او بڼونه زیانمن شول.»
د هرات کرنې او مالدارۍ ریاست د اوبو لګولو او مالدارۍ مرستیال محمد نسیم سحر وايي، روان کال په دغه ولایت کې د انګورو حاصلات ۳۰ سلنه کم شوي او په خبره یې له باغونونو ۱۰۰ زره ټنه انګور ترلاسه شوي. په داسي حال کې چې تیر کال دغه اندازه شاوخوا ۱۴۰ زره ټنه وه.
سحر زیاتوي:« په روان ۱۴۰۲ کال کې د انګورو تولیدات شاوخوا ۱۰۰ زره ټنه دي او په ۱۴۰۱ کال کې ۱۴۰ زره ټنه وو، چې د تېر کال پرتله د انګورو د تولیداتو کچه شاوخوا ۳۰ سلنه کم شوې.»
د هرات کرنې او مالدارۍ خونې مسوولین هم د بڼوالانو اندیښنو په تائید سره وایي، د تیر ژمي سړې هوا او وچکالۍ نه یوازې باغونه زیانمن کړي، بلکې د نورو کرنیزو حاصلاتو د کمښت لامل هم شوي.
د دوی په خبره دې ولایت کې د انګورو حاصلاتو ترڅنګ د وچکالۍ له امله د غنمو حاصلات هم کم شوي.
د هرات د مالدارۍ او کرنې خونې مرستیال نجیب الله رحمتي وايي «موږ سږ کال په هرات کې د غنمو حاصلات نه درلوده، په ځانګړې توګه د هرات په لودیځه حوزې، په ختیځه حوزې ، لکه شینډن، اوبې او داسې نورو کې ویلی شو چې حاصلات یې عادي وو.»
هرات د هېواد په لودیځ کې د کرنې او مالدارۍ په برخه کې یو له مخکښو ولایتونو دی، چې اوسېدونکي یې په پراخه کچه پر بزګرۍ بوخت دي.
