هرات کې په دې وروستیو کې د لومړنیو خوراکي او سون توکو بیو لوړېدو سره د خلکو ستونزې ډېرې شوې او شکایت ته یې اړ کړي.
دوی وایي، بې روزګارۍ او کمزوري اقتصاد له امله په لوړه بیه خپلو کورنیو ته د اړتیا وړ لومړني خوراکي او سون توکي نه شي برابرولی او له اړوند مسوولانو غواړي چې پر بازارونو جدي نظارت ولري.
د هرات اوسېدونکی محمود قاضي زاده وايي: « لومړني خوراکي توکي لکه اوړه، وریجې، غوړي او نور هرڅه قېمته شوي؛ ځکه دلته سم ماموریت نه شته، حتا د موټرو کرایې هم لوړ شوې او له امله یې د خلکو ژوند سخت تېرېږي.»
د هرات اوسېدونکی پرویز وايي: « په داسې حال کې چې هېواد کې تازه امنیت ټینګ شوی او ځوانان له بهرنیو هېوادونو راستنېږي، خو له یوې خوا کار نه شته او له بلې خوا توکي ورځ تربلې قېمته کېږي.»
هټۍ وال هم د توکو بیو لوړوالی مني او وایي، هېواد کې د مخابراتي خدماتو دوه ورځني بندېدو راهیسې د اوړو، غوړیو او وریجو بیو کې له سل تر یو سل پنځوس افغانیو زیاتوالی راغلی او همداراز یو کیلو مایع ګاز له ۴۷ افغانیو څخه ۵۳ افغانیو او یو لېټر تېأ له ۷۰ افغانیو پورته ختلي.
هټۍ وال فردوس محمدي وايي: « یو کارګر د ورځې له ۲۰۰ تر ۳۰۰ افغانیو کار کوي، خو یوه ۱۰ لیټره بوشکه غوړي تر ۱۰۰۰ افغانیو رسېدلي؛ نو تاسو فکر وکړی چې دا کارګر باید څو ورځې د یوې بشکې غوړیو لپاره کار وکړي. په همدې ډول هرڅه ګران شوي او بیې لاهم پورته روانې دي.»
ګاز پلورونکی عبدالقیوم وايي: « څو ورځې وړاندې یوه کیلو ګاز په ۴۵ افغانیو و، خو اوس له ۵۰ افغانیو هم پورته ختلی.»
له بلې خوا، د هرات ځایي مسوولان هم بازارونو باندي د بشپړ نظارت او بیو کنټرول ډاډ ورکوي او زیاتوي چې د بیو کنټرول په موخه یې نرخ پاڼې وېشلې دي او له سرغړونکو سره به جدي چلن وکړي.
د هرات والي ویاند محمد یوسف سعیدي وايي: « د افغانستان اسلامي امارت او د هرات محلي ادارې د بې کیفیته نفتي توکو د وارداتو مخنیوي ترڅنګ، د بیو لوړوالي د مخنیوي لپاره هم هڅې پیل کړې دي.»
د هرات ښاروالۍ ویاند محمد ناصر آرمل وايي: « د هرات ښاروالۍ له خوا په ۱۵ ښاري ناحیو کې د نرخ پاڼې د تطبیق او کنټرول لپاره هره ورځ فعالیت او څارنه ترسره کېږي.»
که څه هم د افغانیو پر وړاندي د ډالر ارزښت کم شوی، خو د هېواد بازارونو کې ورځ تر بلې د توکو بیې د لوړېدو په حال کې دي چې د خلکو په خبره، یاده ستونزه د نرخ پاڼو پر وېشلو نه بلکې پر جدي او دوامداره څارنې حل کېدای شي.
