نیټبورن ویلي، افغانانو په تیره جګړه کې قرباني ورکړې او نور باید ونه ځورول شي.
نیټبورن زیاته کړې:«د طالبانو د بریدونو قربانیانو له کلونو راهیسې د عدالت، حساب ورکونې او جبران لپاره مبارزه کړې، دوی د ډېر څه حق لري. مګر قانون هغه تاوان په اړه محدودیتونه لري،چې محکمه یې د ورکولو واک لري او دغه محدودیتونه د افغانستان بانک شتمنۍ د محکمې له واک څخه لرې ساتي.»
بل خوا له وړاندې د سپټمبر ۱۱مې د قربانیانو کورنیو غړو ویلی ول،چې دوی ته د دغه پیسو ورکول سم کار نه دی او له ولسمشر جو بایډن یې غوښتې وو،چې افغانانو ته یې خپل حق ورکړي.
د سپټمبر یوولسمې پېښې قربانیانو د کورنیو د لیک یوه برخه:« د افغانستان د ۷ میلیارده شتمنۍ څخه د سپټمبر ۱۱ د قربانیانو کورنیو ته د پیسو ورکولو پریکړه له قانوني پلوه شکمنه او له اخلاقي پلوه یو غلط کار دی. ژر امر وکړئ او وې منئ،چې د افغانستان مرکزي بانک پیسې یوازې او یوازې افغانانو پورې اړه لري.»
د دې تر څنګ ملګرو ملتونو کې د افغانسان سرپرست استازي نصیر احمد فایق دغه خبر ته خوښي ښودلې او ویلي يې دي، چې هېله لري،ډېر ژر به د افغانستان بانګ شتمني ازاده شي او افغانانو ته یې مبارکي هم ویلې ده.
که څه هم د کنګل شو پیسو د برخلیک په تړاو تر اوسه پورې کره معلومات نشته دي،خو هېله شته،چې ازادې به شي.
بل خوا اسلامي امارت بیا تر اوسه پورې دغه خبر ته کوم غبرګون نه دی ښودلی،خو له وړاندې یې د خوشي کولو غوښتنه کړې وه او ویلي وو،چې دا د دوی حق نه،بلکې د عامو افغانانو حق دی او کنګل کول یې د ټولو نړیوالو اصولو خلاف عمل دی.
