نیویارک ټایمز: د اسلامي امارت له واک ته رسیدو وروسته د مخکېني حکومت ۴۹۰ ځواکونه او کارکوونکي وژل شوي

نیویارک ټایمز ورځپاڼې د یوه راپور په وړاندې کولو سره ویلي،په تیرو اووه میاشتو کې څه باندې ۴۹۰ کسان د تیر حکومت نظامیان او هغوی،چې د امریکا له متحده ایالتو سره یې کار کړی دی، وژلي او اختطاف کړي دي.

په دغه راپور کې راغلي، څیړنې یې اوس هم دوام لري،چې د تیر نظام څومره ځواکونه وژل شوي او څومره یې اوس هم برمته دي.

راپور کې وړاندې راغلي،چې د لادرکه شويو کسانو کورنیو غړیو ویلي، د اسلامي  امارت له لوري وړل شوي کسان تر اوسه پورې بېرته کورونو ته نه دي ستانه شوي.

د نیویارک ټایمز، راپور وايي، دغه ځواکونه داسې مهال وژل شوي او برمته شوي چې اسلامي امارت د واک په پېل کې عمومي عفوه اعلان کړی وه.