Skip to content
د نړیوال بانک ویاند ویلي ، دا بانک د افغانستان د اوسني وضعیت او همدارنګه د مېرمنو په اړه “ژوره اندیښنه” لري.
د نړیوال بانک دې چارواکي ویلي، دغه بانک به له نړیوالې ټولنې او خپلو پراختیايي شریکانو سره د افغانستان د اوسني وضعیت او په هغه هېواد کې د لاسته راوړنو د ساتلو په اړه سلا مشورو ته دوام ورکړي.
وروسته له هغه، چې طالبانو د اګست پر ۱۵مه نېته کابل ونیو، بهرنیو مرسته کوونکو اعلان وکړ، چې لږ تر لږه د لنډ وخت لپاره له افغانستان سره خپلې مرستې بندوي.
د امریکا متحده ایالتونو اعلان وکړ، چې د افغانستان د مرکزي بانک په میلیاردونو ډالره یې، چې اوسمهال د نیویارک ښار په فدرالي زېرمو کې دي، کنګل کړي دي.
د پیسو نړیوال صندوق (IMF) هم د ۴۵۰ میلیونو ډالرو څخه، چې ټاکل شوېده په همدې اوونۍ کې د افغانستان حکومت ته سپارل شوي وای، ځنډولي دي.
جرمني هم اعلان کړی، چې د دې هیواد هغه ۳۰۰ میلیونه ډالره مرسته، چې ټاکل شوې وه د افغانستان حکومت ته ورکړل شي، نه ورکول کیږي.
خو د امریکا ولسمشر جوبایډن بیا ویلي، له افغانستان سره به د امریکا بشر دوستانه مرستې دوام وکړي، خو له افغانستان څخه به په بشپړ ډول د امریکا او ناټو ځواکونو تر وتلو وروسته د نړیوالو مرسته کوونکو سازمانونو فعالیتونه هم مبهم پاتې دي
