Skip to content
د نړیوال بانک اجرائیه بورډ د سې شنبې په ورځ د «۱۴۰۰ کال د کب پر ۱۰ مه» پریکړه وکړه،چې د افغانستان د کنګل شویو ۹،۵ میلیارده ډالرو څه باندې یو میلیارد ډالر آزادوي او دلته به یې د بشري او اقتصادي ناورین سره د مبارزې په برخو کې ولګوي.
د یاد بانک له لوري په خپره شوې خبرپاڼه کې ویل شوي دغه پیسې به د اسلامي امارت له لاسرسي پرته د ملګرو ملتونو او نورو مرستندویه ادارو له خوا د افغانستان په ښوونییز،کرنیز او روغتیا سکتورونو او کورنیو پروګرامونو برخو کې لګول کیږي.
د نړیوال بانک د خبرپاڼې یوه برخه:«د دې پریکړې موخه دا ده،چې د اړمنو افغانانو ملاتړ وشي او هغوی ته اړین مواد ورسول شي. له پریکړې مو بله موخه دا هم ده،چې په افغانستان کې د کلیدي اقتصادي او ټولنیزو خدمتونو ساتنه وشي،ترڅو راتلونکې کې بشري مرستو ته اړتیا کمه احساس شي.»
له کنګل شوې پانګې دغه یو میلیارد ډالر د افغانستان د بیارغونې له وجهي صندوقه آزادې شوې،چې په تېرو څو کلونو کې د افغانستان لپاره د بېلابېلو مرستندویه هېوادونو له خوا مرسته شوي دي. نړېوال بانک ویلي،د دې ډاډ باید ورکړل شي دی،چې د دې پیسو د لګولو له ګټو افغان ښځې او نجونې هم برخمنې کیدلی شي.
د نړیوال بانک د خبرپاڼې یوه برخه:« په لومړیو کې باید له افغانستان سره مرستندویه هېوادونه باید د ۶۰۰ میلیونه ډالرو په ارزښت د هغو څلورو پروژو په اړه پریکړه وکړي،چې د ښوونې،روغتیا، کرنې او خلکو د ژوند په اړه دي.»
نړیوال بانک ویلي،دغه پیسې به د حاکم حکومت یا اسلامي امارت له لاسرسي پرته د ملګرو ملتونو او نورو مرستندویه ادارو له خوا ولګول شي،خو شنونکي بیا ټینګار پر دې لري،چې دغه پيسې دې د اسلامي امارت تر څار لاندې ولګول شي.
د افغانستان د بیارغونې وجهي صندوق،چې د نړیوال بانک له خوا اداره کیږي،دغه یو میلیارد ډالر په کې د تېر کال په اګست میاشت کې د امریکایانو له وتلو او واک ته د اسلامي اماتر له رسیدو وروسته کنګل اعلان شوې.
