د ولسمشر لومړي مرستیال امرالله صالح ویلي، دا جلسې به په منظم ډول دوام لري خو پر فیسبوک به یې جزیات نه شریک کیږي.
امرالله صالح له شاوخوا دوو میاشتو راهیسې د کابل د امنیت مسوول دی او د وضعیت د ښه والي لپاره یې د شپږ نیمو بجو غونډې پيل کړي دي.
صالح لیکلي، د تېرو دوو میاشتو کارونه او لاس ته راوړنې به هم و ارزوي.
امرالله صالح همدا راز د خپلو خبرو پر دوام ویلي چې د کابل ښاریانو د امنیت لپاره خپلې هڅې ډېروي او په وینا یې د طالبانو د پلانونو شنډولو ته به ادامه ورکوي.
هغه په کابل کې د ټولو ترورونو او هدفي وژنو پړه یو ځل بیا پر طالبانو اچولې ده او په خبره یې دغه ډله هڅه کوي د مدني ټولنې د غړو په وژلو سره د عدالت او ازادۍ غږ چوپ کړي.
طالبانو بیا تر دې وړاندې ویلي چې د کابل په وروستیو بریدونو کې د دوی لاس نشته دی.
امرالله صالح دا ژمنه هم کړې ده چې ژر تر ژره به د فیفا د اجرایوي مشر قاتلین ونیسي او په اړه یې پلټنې پیل کړې دي.
