د نورستان والي قاري زین العابدین عابد له شمشاد ټلوېزیون سره په ځانګړې مرکه کې وايي چې تېرکال په دې ولایت کې ۲۸۹ سترې او کوچنۍ پراختیايي پروژې پلې شوې دي.
د هغه په خبره، د هوټلونو جوړېدو، سیاحتي سیمو ته غځېدلو لارو جوړېدو، د امنیتي تدابیرو پیاوړتیا له امله سیاحت وده کړې او د خلکو پر اقتصاد یې مثبت اغېز کړی او همدارنګه یې ګڼو کسانو ته د کار زمینه هم برابره کړې ده.
عابد دغه راز وايي، د امنیتي وضعیت له ښه کېدو سره د خلکو تګ راتګ، سوداګري او سیاحت زیات شوي او ولایتي اداره هڅه کوي چې د سړکونو، برېښنا، کرنې، مالدارۍ، کانونو او سیاحت په برخو کې نورستان پر ځان بسیا او پرمختللی ولایت وګرځوي.
قاري زین العابدین عابد وايي: « له کونړ تر نورستان پورې سړک قير شوی، له نورستان څخه تر بدخشان پورې هم د سړک جوړولو منظوري د نظام له مشرتابه اخستل شوې چې کارونه به یې ژر پيل شي.»
نورستان والي که څه هم د ولایت اوسنۍ بودیجه د ټولو اړتیاوو د پوره کولو لپاره بس نه بولي، خو وايي د مرکزي ادارو او مرستندویه بنسټونو په همکارۍ، د پراختیایي پروژو د پلي کېدو هڅې روانې دي.
نوموړي زیاتوي، د سړک جوړونې، روغتیا، پوهنې او اوبو رسونې په برخو کې هم د پام وړ پرمختګونه شوي دي.
د هغه په خبره، یوازې په تېر کال کې۲۳ ښوونځي ترمیم شوي او په بېلابېلو ولسوالیو کې لسګونه پراختیایي پروژې عملي شوې دي.
نورستان والي د خپلې ادارې مهمې ژمنې د سړکونو او زېربناوو پراختیا، د روغتیا او پوهنې خدماتو ښه والی او د ختیځ او لوېدیځ نورستان د عمومي سړکونو اساسي رغونه بللي.
زین العابدین عابد په دې اړه وايي: « موږ د دوه کیلومټره حلقوي سړک منظوري هم اخستې. دا سړک به شل متره سور ولري او ژر به یې کارونه پيل شي.»
نورستان والي د سرحدي سیمو په اړه وايي چې د اسلامي امارت ځواکونه په سرحدي سیمو کې حضور لري او د هېواد د ځمکنۍ بشپړتیا د ساتنې لپاره خپل مسوولیتونه ترسره کوي.
عابد د مخابراتي خدماتو د پراختیا په برخه کې د ۳۵ مخابراتي انتنونو د فعالېدو خبر هم ورکړ او وايي، ګڼې سیمې له انټرنېټي او مخابراتي خدماتو برخمنې شوې دي.
