نورستان کې د هغه سړک د جوړیدو چارې پيل شوې چې د دې ولایت دوه ولسوالۍ کامدېش او برګمټال له مرکز پارون سره نښلوي.
مسوولین وايي، د دغه ۱۰ کیلو مټره سړک جوړیدو لپاره ۲۹ میلیونه افغانۍ بودیجه ځانګړې شوې.
د نورستان والي زین العابدین عابد وايي: « د شرقي نورستان او مرکزي نورستان ترمنځ کنډو ده چې د پپړوک سړک ورته وايي او الحمد الله نن مو افتتاح کړ چې دا ۱۰ کیلو متره سړک دی او عرض یې شپږ متره ده او ۲۹ میلیونه افغانۍ پرې لګښت راځي او دغه لګښت د اسلامي امارت لخوا ورکول کیږي.»
اوس مهال چې د یادو ولسوالیو اوسېدونکي د نورستان مرکز ته د تګ نږدې او مستقیمه لار نه لري، د دې سړک په جوړېدو خوښ دي.
د نورستان اوسېدونکی عبد الحکیم وايي: « موږ ټول قوم د سړک په جوړېدو خوشحاله یو، ځکه د دوو ولسوالیو خلک به دوه ولایتونه پاس کول بیا به مرکز ته رسېدل او دا به زموږ قوم ته یو لوی سهولت وي.»
د نورستان یو بل اوسېدونکی ضیا الرحمن وايي:« دا ډېره حیاتي پروژو ده او حیاتي سړک دی او د ولسونو د تګ راتګ لپاره یوه نږدې لاره جوړه شوه.»
په همدې حال کې د نورستان ټولګټو چارو ریاست مسوولین ډاډ ورکوي چې د سړک جوړونې له کارونو څارنه کوي او زیاتوي چې کارونه به يې پر خپل وخت پای ورسېږي.
د نورستان ټولګټو چارو ریاست سرپرست عبد الحکیم سجاد وايي: « د نورستان ولایت د ټولګټو چاریو ریاست تخنیکي ټیم به وخت پر وخت نظارت کوي او همیشه به د دې د کیفیت په اړه خپل نظارت کوي او خپل راپور به مرکزي کمیټې سره شریک کوي او موږ ډاډ ورکوو چې دا پروژه به په باکیفیته توګه سرته رسیږي.»
د یادونې ده چې نورستان د خپل غرني موقعیت له امله يې لاهم ډېر سړکونه خام او یا هم د لارې په اوږدو کې د تګ لپاره مناسب نه دي چې له امله يې ورتلونکي سیالانیان او د دې ولایت اوسېدونکي پر ژر جوړېدو ټینګار کوي.
