د نورستان او پنجشېر ولایتونو ترمنځ ۳۰ کیلومټره سړک جوړ او دغو ولایتونو ته د تګ راتګ ټرانسپورټي لار په لومړي ځل وکارول شوه.
دا سړک چې د یونپس ادارې له خوا د ۱۳.۸ میلیون افغانیو په لګښت د ۵ میاشتو په موده کې بشپړ شو.
د نورستان والي قاري زین العابدین وايي: « دا د چپې درې سړک دی چې نن مو ګټه اخیستنې ته وسپاره. د دې سړک کارونه له نن څخه څلور میاشتې وړاندې پیل شوي وو. د دې سړک له لارې به د نورستان منډول ولسوالي له پنجشېر سره وصل شي. په دې سړک تقریبا ً ۱۴ میلیونه افغانۍ لګښت راغلی.»
د سیمې اوسېدونکي وايي، دا سړک د دواړو ولایتونو اوسېدونکو لپاره ډېر مهم دي، ځکه له دې وړاندې یې موټر رو لاره نه لرله او د تګ راتګ لپاره یې له آسونو کار اخیست.
ځايي اوسېدونکی نور احمد وايي: « ډېر خوښ یو چې دا سړک له پنجشېر ولایت سره وصل شو. په دې سره به له پنجشیر سره زموږ تګ راتګ نږدې شي او په ځانګړې توګه ناروغان به مو په وخت روغتون ته ورسېږي.»
ځايي اوسېدونکی سلطان محمد وايي: « په تېر کې چې موږ کومې ستونزې لرلې، له دې سړک سره به کمې شي. موږ د خپلو ورځنیو توکو په اکمال کې له ستونزو سره مخ وو، ځکه دا اکمالات د آسونو په وسیله ترسره کېدل.»
که څه هم یاد سړک ګټې اخیستنې ته سپارل شوی، خو د پروژې مسوولین وايي، له دې لارې د خلکو پراخې ګټه اخیستنې لپاره يې د پراخولو هڅې کوي.
د ډاکار موسسې ساحوي انجینیر شفیع الله وايي: « د دې سړک اوږدوالی ۳۰ کیلومټره دی او ۴ متره سور لري. د سړک کیفیت د اوس لپاره ښه دی، خو اړتیا ده چې نور هم پراخ شي، ځکه دا سړک د هېواد ختیځ له شمال سره وصلوي.»
د يادونې وړ ده چې تر دې مخکې د نورستان مرکز پارون د اسټيوي سېم درې سړک له جوړېدو سره، دا ولایت د بدخشان له سرحدي نقطې سره وصل شو او د دواړو ولايتونو د بشپړو نښلېدو هڅې روانې دي.
