وروسته له هغې چې د اسلامي امارت د مشرتابه له لوري د ځمکو د غصب مخنیوي کمیسیون په فعالیت پيل وکړ، ورسره په ټولو ولایتونو کې د ډېر شمېر دولتي ځمکو د تثبیت خبرونه ورکړل شول.
یاد کمیسیون په ننګرهار ولایت کې هم شاوخوا ۱۷۸ زره۶۲۰ جریبه ځمکه له څېړنو او تثبیت وروسته استرداد کړې.
د عدلیې وزارت ویاند حافظ برکت الله رسولي وايي، یادې ځمکې په کامې، لعلپورې، اچین، کوټ او هسکې مینې ولسوالیو او جلال اباد ښار کې موقعیت لري.
رسولي په دې اړه وايي: « اوس مهال څه باندې ۳۲۳ زره ۹۶۴ جریبه ځمکه په ننګرهار ولایت کې امارتي تثبیت شوې او په اړه یې څېړنې روانې دي، ترڅو بېرته استرداد شي.»
رسولي زیاته کړې، اوس مهال۳۲۳ زره ۹۶۴ جریبه ځمکه په ننګرهار کې دولتي تثبیت شوې، خو په تړاو یې څېړنې لا نه دي بشپړې شوې.
د عدلیې وزارت ویاند په دې اړه وايي: « په ننګرهار ولایت کې کابو ۱۷۸ زره ۶۲۰ جریبه ځمکه له بررسي کولو او تثبیت وروسته استرداد شوې. یادې ځمکې د ننګرهار ولایت په بېلابېلو ولسوالیو او سیمو کې موقعیت لري چې د ځمکې له غصب د مخنیوي تخنیکي هیئت له بررسۍ او تثبیت وروسته د مرکزي کمیسیون د پرېکړې یا هم په دې اړه د ځانګړې محکمې له پرېکړې سره سم، استرداد شوې دي.»
په ورته مهال، د ننګرهار اوسېدونکي له دې کمیسیون غواړي چې هغه کسان مجازات او تاوان ترې واخلي چې غصب کړې ځمکې یې پر خلکو پلورلې دي.
د ننګرهار اوسېدونکی سمیع الله وايي: « موږ د دې اقدام هرکلی کوو، په تېر نظام کې دولتي چارواکو او زورواکو ګڼې دولتي ځمکې غصب کړې دي. اوس چې کوم کمیسیون رامنځته شوی او دا ګام یې پورته کړی، غصب شوې ځمکې یې بېرته راګرځولې دي، موږ د دې ګام ستاینه کوو. موږ له مسوولو چارواکو غوښتنه کوو چې دا لړۍ جاري وساتي.»
د ننګرهار یو تن بل اوسېدونکی شباب وايي: « هغه ځمکې چې غاصبینو په خلکو خرڅې کړې دي، خلکو پرې تاوانونه او مصارف کړي، باید دا تاوانونه او لګښتونه له غاصبانو واخیستل شي او تاواني کسانو ته ورکړل شي.»
د ځمکو د غصب کمیسیون په دې ولایت کې داسې مهال د ځمکو د بېرته راګرځولو خبره کوي چې د دې ولایت د اوسېدونکو په خبره، لاهم ډېرې داسې سیمې شته چې دولتي ځمکې یې پر خلکو پلورل شوې دي.
