د ننګرهار امنیې قوماندانۍ مسوولینو د یوه خبري کنفرانس پرمهال وویل، تېرو۱۰ میاشتو په موده کې یې د غلا، قتل، رشوت، قاچاق، فرېبکارۍ، غصب او نورو خلکو ته د اخطار ورکولو په جرم، نږدې ۲ زره تنه نیولي دي.
د ننګرهار امنیې قوماندانۍ مرستیال مولوي محمد طاهر مبارز وايي: « په تېر یوه کال کې ۱ زر۹۷۶ تنه د بېلابېلو جرمونو په تور نیول شوي. دغه نیول شوي کسان د څېړنو لپاره عدلي او قضايي ارګانونو ته سپارل شوي دي.»
د مبارز په خبره، د جنايي پېښو د مخنیوي لپاره يې موبایل پلورونکو ته سپارښتنه کړې چې بي اسنادو موبایلونه ونه پلوري.
هغه په دې اړه وايي: « د هرې حوزې اړوند دوکانداران حوزې ته غوښتل شوي او ورته سپارښتنه شوې چې هېڅوک به له اسنادو پرته نه له چا موبایل ټیلفون اخلي او نه به یې پلوري. که چېرې څوک له دې سپارښتنې سرغړونه وکړي، اسلامي امارت او قانون ته به مجرمان وي.»
په همدې حال کې، جلال اباد ښاریان د مبایلونو له غلا او جنايي جرمونو لوړې کچې شکایت کوي او وايي، امنیتي ادارې باید د غلاګانو او جنايي جرمونو د مخنیوي لپاره جدي ګامونه پورته کړي.
د جلال اباد ښار یو تن اوسېدونکی وايي: « له چارواکو هیله لرو او غوښتنه کوو چې امنیتي وضعیت ته پاملرنه نوره هم ډېره کړي او هغه کسان چې د غلا یا بل جرم په تور نیول کېږي، باید قانوني سزا ورکړل شي، ترڅو د جرم له تکرار مخنیوی وشي.»
د جلال اباد ښار یو تن بل اوسېدونکی بیا وايي: «غله نیول کېږي، خو بېرته ژر خوشې کېږي. موږ غوښتنه کوو چې دغو کسانو ته دې سزا ورکړل شي، ترڅو پاتې جرمونه هم ورسره ختم شي.»
مسوولین د نشه يي توکو پر وړاندې مبارزه هم بریالۍ بولي او په خبره يې، سږ کال هم د نورو کالونو په څېر په دې ولایت کې د نشه يي توکو د کښت او قاچاق مخنیوی شوی.
