د ننګرهار ولایت کار او ټولنیزو چارو ریاست په همغږۍ د یوې مرستندیه موسسې په همکارۍ ۷۸۰ کسان په بېلابېلو برخو کې له شپږ میاشتنیو مسلکي او حرفوي زده کړو فارغ شول.
نوي فارع شوي ځوانان له دې چارې خوښ دي او په خبره يې، مخکې بې روزګاره وو او اوس يې چې حرفوي زدهکړې ترلاسه کړې، د کار کولو زمینه هم ورته برابره شوه.
له حرفوي زدهکړو فارع شوی یو تن وايي: « موږ د غالۍ اوبدلو زده کړه ترلاسه کړې، په دې برخه کې مو کار ښه زده کړی، په خپل کار حاکم یو او کولی شو نورو زده کوونکو ته کار ور زده کړو.»
د کار او ټولنیزو چارو ریاست مشر فرید الله حقاني وايي، د همکارو موسسې په مرسته يي ګڼ فرصتونه رامنځ ته کړي.
د حقاني په خبره، نږدې ۱۷۰۰ کسانو ته د وړو کاروبارونو زمینه سازي کړې او هڅه کوي، چې په راتلوونکې کې له ځېنو همکارو بنسټونو سره په همغږۍ سلګونه تنو علمي، مسلکي او باتجربه ځوانانو ته د کار کولو فرصتونه رامنځته کړي.
حقاني زیاتوي : « دغه ۴۸۰ کسانو، چې په بېلو بېلو حرفو، چې ټولې ۷ حرفې دي، په دې کې خیاطي، برق جوړونه، غالۍ اوبدل، د سولر ترمیم، بکسې جوړول او داسې نور شامل دي، زده کړې کړي او ټول ځوانانو ته یې د زده کړو زمینه برابره شوې.»
د مرستندویه موسسې مسوولین وايي، تر دې مهال يي سلګونه ښځو او نارینه وو ته په بېلابېلو برخو کې روزنه ورکړې او دا لړۍ به روانه وساتي.
د ایچ.ار.ډي موسسې مسوول ذبیح الله شېرزاد وايي: « په دغه پرګرام کې ۴۸۰ تنه ځوانانو ته ۶ میاشتې هره میاشت ۸ قلمه خوراکي توکي ورکول کېدل او ترڅنګ یې د پرګرام په پای کې کوم کېټونه چې دوی ورته اړتیا لري، هغه ورته په پام کې نیول شوې دي او ورته به ورکړل شي.»
د ننګرهار کار او ټولینزو چارو رياست مسوولین وايي، له تېرو دوه کلونو را پدېخوا يي نږدې پنځه زره تنو ته په بېلابېلو برخو کې زدهکړي ورکړي، چې ډېری هغه يې اوس مهال پر دندو او کار بوخت دي.
