په ننګرهار ولایت کې د پوهنې ریاست تر چتر لاندې د یو خصوصي ښوونځي د زده کوونکو په لاس د جوړ شویو توکو درې ورځنی نندارتون پيل شو.
مسوولین وايي، د دې نندارتون موخه د نوښتګرو زده کوونکو هڅونه، ملاتړ او د دوی استعدادونو ته وده ورکول دي.
د نندارتون تنظیموونکی احمد طارق کمال وايي:« زده کوونکي وهڅو نوښتونو ته، تحقیق ته، ترڅو موږ وکولی شو چې یوه ټولنه ولرو چې هغه پر تحقیق استواره وي. انشاالله په راتلونکې له څنګه چې نورو ټولنو له ساینس ګټه اخیستې ده او پرمختګ یې په برخه شوی دی، زموږ افغانستان هم په دغه برخه کې لاسته راوړنې ولري.»
په دغه نندارتون کې زده کوونکو د روان ښونیز کال په جریان کې په لاس جوړ شوي توکي نندارې ته وړاندې کړل.
دوی د ورته نورو نندارتونو جوړیدو ته هیله من دی چې له امله به يې راتلونکي کې لا ښه نوښتونه وکړي.
زده کوونکی سمیع الله وايي:« موږ کولی شو، که نن مو یو عادي شی جوړ کړ، موږ کولی شو سبا له دې یوه مفکوره واخلو.»
یو بل زده کوونکی مصطفی بیا وايي:« زموږ ښوونځي کې چې نن دا کوم نندارتون دی، دا ډېر مهم دی. موږ غواړو چې په نورو ښځیو کې هم دا شان ناستې ترسره شي، ترڅو د زده کوونکو استعداد په کې مالوم شي.»
د ننګرهار پوهنې ریاست مسولین وايي، د ټولو هغو زده کوونکو مادي او معنوي ملاتړ ته ژمن دي چې پر نوښتونو کار کوي.
د ننګرهار پوهنې رییس محمد شریف حلیمي وايي:« موږ ستاسو ترڅنګ ولاړ یو، دا ډاډ بیا بیا درکوم چې کومې اړتیاوې مو وي او زموږ په وس پوره وي، انشا الله تر امرالمومنین پورې به زه ستاسو خبره رسوم. »
د ښوونیزې برخې استادان سپارښتنه کوي چې ښوونځیو کې دې له تیورۍ سربېره زده کوونکو ته ډغه ډول نندارتونونه ډېر کړي چې د زده کړې له پيله نوښتونه وکړي.
