ختیځ کې د ملي امنیت صفر دوه قطعې ځواکونو په یوې خبر پاڼې کې ویلي چې تېره شپه یې د ننګرهار ولایت جلال اباد ښار اتمې ناحیې په مومن اباد سیمه کې شپني عملیات ترسره کړي، چې په پایله کې د داعش ډلې یو قوماندان، اولدار چې په بابک مشور دی، نیولی دی.
په خبرپاڼه کې دغه راز راغلي چې په یادو ځانګړو عملیاتو کې ملا غني الله چې د کنړ ولایت، څوکۍ ولسوالۍ لپاره تش په نوم د داعش قاضي و، هم نیول شوی دی.
د ملي امنیت صفر دوه قطعې ځواکونه همدا راز وایي چې د بهسودو ولسوالۍ په یوولسمې ویالې سیمه کې یې هم شپني عملیات ترسره کړي، چې په پایله کې یې د داعش ډلې دوه غړي چې یو تن یې د جلال اباد ښار ته د ځانمرګو د لېږدولو دنده په غاړه لرله، نیولي دي.
خبرپاڼه کې همدارنګه راغلي چې د داعش د ډلې یو بل تن چې عبدالجلال نومیږي، بیا د جلال اباد ښار لومړۍ ناحیې کې د شپنیو عملیاتو په ترڅ کې نیول شوی.
خبرپاڼه وایي چې عبدالجلال د ننګرهار پر محبس برید کې هم لاس درلود.
