د ننګرهار ولایت دره نور ولسوالۍ د ستن سیمه کې د لسګونه ځايي کروندګرو له لوري شاوخوا یوه نیمه لسیزه وړاندې د یوې بهرنۍ کرنیزې پروژې په مالي همکارۍ اصلي ګلاب کرل شوي.
که څه هم د ګلابو کروندګر د خپل کښت له حاصلاتو خوښ دي؛ خو وايي د ګلابو د ټولولو پرمهال له ګڼو ستونزو سره مخ وي او غوښتنه کوي، چې د ګلابو ټولونې وسایلو ترڅنګ دې ورسره د اصلاح شویو تخمونو مرستې هم وشي.
کروندګرعبدالحلیم وايي: « مخکې مې غنم او جوار کرل تر دې ډېر مخکې کوکنار هم خلکو کرل، ما هم تر یوه وخته پورې کرل، اوس د الله فضل دی د ګلاب ګلانو دا پروژه راغله او همدا کرو او ډېر ترې خوښ یو.»
یو بل کروندګرغلام الرحمان نوري وايي: « خلکو ته اصلاح شوي توخمونه ورکول کېدل، لکه د ترکاریو او پیازو چې د ګلانو ترمنځ یې وکري، همداسې نور توخمونه او وسایل وخت پر وخت ورکول کېدل او اوس هم غواړو موږ سره د دې توخمونو مرسته وشي.»
کروندګر وايي، په دې وروستیو کې یې د ګلابو د پېر بازار کمرنګه شوی، چې له مسوولو چارواکو او اړوندو مرستندویه موسسو ورته د بازار موندنې او د دې پروژې د لا پراختیا غوښتنه کوي.
کروندګرعبدالمالک وايي: « نړیوالو ته دې زموږ د ګلابو حاصلات، عطر او درمل وړاندې شي او دې ته د بازار موندنه وشي.»
یو بل کروندګر مسلم علي وايي: « له اسلامي امارته مو غوښتنه ده چې دغسې پروژو ته پاملرنه وکړي او دا پروژې پراخه کړي. ډېری کروندګر داسې دي چې د ګلابو د کښت لېواله دي خو اوس دا پروژې کمې شوې دي؛ نو دا پروژې باید پراخه شي.»
په همدې حال کې د ننګرهار د کرنې، اوبو لګولو او مالدارۍ ریاست مشر مولوي محمد ولي محسن وايي، د تېر کال پرتله په دغه ولایت کې د ګلابو په حاصل کې د پام وړ زیاتوالی راغلی او زیاتوي، چې د اړوندو مرستندویه ادارو پر مټ به د ګلابو د کروندګرو ستونزو ته رسېدنه وکړي.
محسن زیاتوي: « سږکال به د اټکل له مخې، ۱۶۰ مټریک ټنه حاصل ورکړي ان شاءالله. تېر کال په ۳۵۰ جریبه ځمکه کې کرل شوي و چې ۱۰۵ مټریک ټنه حاصل یې ورکړی و؛ نو په دې اساس ان شاءالله موږ دوی ته هغه وسایل چې اړین دي په دې برخه کې به مرستې او همکاري کوو.»
د ننګرهار د کرنې، اوبو لګولو او مالدارۍ ریاست د مالوماتو له مخې، دا مهال د دغه ولایت په دره نور، سپین غر او اچین ولسوالیو کې د اصلي ګلابو بڼونه جوړ دي، چې له ګلابو یې درمل او عطر جوړېږي او هېواد کې ترې د ګټې اخېستنې سربېره بهرنیو هېوادونو ته هم لېږدول کېږي.
